परदेश अभ्यास दौऱ्यासाठी पुणे जिल्ह्यातील ४८६ शेतकरी इच्छुक

परदेश दौरा
परदेश दौरा
पुणे ः परदेशातील शेतीमधील नवीन अद्ययावत तंत्रज्ञान शेतकऱ्यांना माहिती व्हावे, या उद्देशाने कृषी विभागामार्फत परदेश अभ्यास दौऱ्याचे आयोजन केले जाते. दोन ते तीन महिन्यांपूर्वी इच्छुक शेतकऱ्यांकडून अर्ज मागविण्यात आले होते. कृषी विभागाकडे ३१ मार्चअखेरपर्यंत इच्छुक पुणे जिल्ह्यातील शेतकऱ्यांचे तब्बल ४८६ अर्ज दाखल झाले आहेत; मात्र अद्याप शासनाने निधी उपलब्ध करून न दिल्याने अभ्यास दौऱ्यासाठी इच्छुक शेतकऱ्यांच्या स्वप्नांवर पाणी फिरणार असल्याचे चित्र आहे. 
विविध प्रगत देशांतील विकसित आणि आधुनिक तंत्रज्ञानाची माहिती करून देणे, तसेच शेतीमालाची निर्यात, पणन व बाजारपेठेतील मागणी, कृषीमाल प्रक्रिया याबरोबरच त्या देशामध्ये उपयोगात येत असलेले तंत्रज्ञान अवगत करून त्याचा वापर राज्यातील शेतकऱ्यांना त्यांच्या शेतावर करण्यासाठी सहाय्य करणे हा योजनेचा मुख्य उद्देश आहे. त्यासाठी २००८ पासून शेतकऱ्यांना चीन, इस्राईल, जर्मनी, नेदरलॅंड्‌स, ऑस्ट्रीया, स्वित्झर्लंड, फ्रान्स, स्पेन, व्हिएतनाम, मलेशिया, थायलंड, ऑस्ट्रेलिया, न्यूझीलंड, सिंगापूर आदी ठिकाणी अभ्यास दौऱ्यासाठी पाठविले जाते.
या अभ्यास दौऱ्यातून मिळालेली माहिती लाभ पुणे जिल्ह्यातील बहुतांशी शेतकऱ्यांनी घेत शेतात काही प्रमाणात बदलदेखील केले आहे; मात्र मागील दोन ते तीन वर्षे हा दौरा बंद करण्यात आला होता. गेल्या आर्थिक वर्षात परदेश अभ्यास दौऱ्यासाठी पुणे जिल्ह्यातील इच्छुक शेतकऱ्यांनी अर्ज करावेत, असे आवाहन कृषी विभागाने केले होते. 
अभ्यास दौऱ्यासाठी एकूण ४९४ अर्ज दाखल झाले होते. त्यापैकी आठ अर्ज अपात्र ठरले असून, ४८६ अर्ज पात्र ठरविण्यात आले आहे. पात्र ठरविलेल्या अर्जांची यादी कृषी आयुक्तलयामार्फत सरकारकडे पाठविण्यात आली आहे.
शेतकरी अभ्यास दौऱ्यासाठी हवेली तालुक्‍यातून सर्वाधिक
शेतकरी इच्छुक आहेत. या तालुक्‍यातून सर्वाधिक ९२ अर्ज दाखल झाले आहेत. त्यापाठोपाठ शिरूर तालुक्‍यातून ६६ अर्ज दाखल झाले आहेत, अशी माहिती जिल्हा अधीक्षक कृषी कार्यालयाच्या सूत्रांनी दिली. 
 
तालुहानिहाय पात्र शेतकरी
तालुका शेतकरी संख्या 
भोर    २०
वेल्हा १२ 
मुळशी ३३ 
मावळ ३२
हवेली ९२
खेड  १६ 
आंबेगाव २९ 
जुन्नर ५२ 
शिरूर ६६ 
पुरंदर २२
बारामती ४० 
दौंड ३७ 
इंदापूर ३५

 

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com