नाशिक विभागातील शेतकऱ्यांना कृषी सिंचन योजनेच्या अनुदानाची प्रतीक्षा

पंतप्रधान कृषी सिंचन योजनेत अनुदानासाठी विभागातील ६० हजार १८६ शेतकऱ्यांनी ऑनलाइन नोंदणी केली. त्यासाठी २२९ कोटी १३ लाख ५७ हजार रुपये निधीची गरज होती. मात्र प्रत्यक्षात ६९ कोटी ५२ लाख ३६ हजार रुपये इतकाच निधी विभागातील चार जिल्ह्यांना वितरीत करण्यात आला.

ऑनलाइन नोंदणी केलेल्यापैकी अवघ्या ३१ हजार ६४२ शेतकऱ्यांच्या प्रस्तावांनाच कृषी विभागाने पूर्वमान्यता दिली. त्यापैकी केवळ १७ हजार ५९६ शेतकऱ्यांनाच अनुदानाचा प्रत्यक्ष लाभ मिळाला आहे. अजूनही १४ हजार ४६ शेतकऱ्यांना अनुदानाची प्रतीक्षा आहे. जिल्ह्यांना वितरीत झालेल्यापैकी अद्यापही २० कोटी ६७ लाख ७५ हजार रुपयांचा निधी जिल्ह्यांकडे पडून आहे.