खानदेशातील शेतकरी शासकीय खरेदीच्या प्रतीक्षेत

जळगाव : खानदेशात शासकीय धान्य खरेदीसंबंधी अजून कोणतेही आदेश आलेले नाहीत. शेतकऱ्यांना नोंदणीचे संदेश आले, परंतु पुढील संदेश भ्रमणध्वनीवर आल्याशिवाय धान्य विक्री करता येणार नाही. त्याची प्रतीक्षा शेतकऱ्यांना आहे.

मूग, उडीद व सोयाबीनची खरेदी करण्यासंबंधी नोंदणी सुरू आहे. शेतकऱ्यांनी नोंदणीसाठी संबंधित नोंदणी केंद्रात अर्ज दिले आहेत. परंतु ऑनलाइन नोंदणीला विलंब होत आहे. कारण सर्व्हर डाउन व इतर अडचणी येत आहेत. नोंदणीचे ॲपही व्यवस्थित काम करीत नाही. यामुळे नोंदणीला विलंब होत आहे. खानदेशात सुमारे सात हजार शेतकऱ्यांची नोंदणी झाली आहे. उडदाच्या विक्रीसाठी अधिकची नोंदणी झाली आहे.

नोंदणीसाठी जवळपास १० हजारांवर अर्ज सादर झाले आहेत. नोंदणीला प्रतिसाद मिळत असल्याने खरेदीला सुरवात करायला हवी. मुदतवाढ असूनही खरेदीला सुरू होत नाही. नोंदणीला मुदतवाढ कायम राहू द्यावी, असेही शेतकऱ्यांचे म्हणणे आहे.