संत्र्याच्या पीकविम्यासाठी कृषिमंत्र्यांकडे धाव

अकोला : संत्रा पिकाची नुकसानभरपाई म्हणून मिळालेल्या विम्याची रक्कम राष्ट्रीयीकृत बॅंकेने कर्जखात्यात जमा केल्याने धास्तावलेले शेतकरी प्रशासनाच्या पायऱ्या झिजवून थकले आहेत. या शेतकऱ्यांनी आता थेट कृषिमंत्री पांडुरंग फुंडकर यांच्याकडे धाव घेत दिलासा देण्याची मागणी केली आहे.

पीकविम्याची रक्कम कर्जखात्यात जमा करण्याचा अधिकारच बॅंकांना नसल्याचे या वेळी मंत्री म्हणाले असल्याचे शेतकऱ्यांनी सांगितले. निदान यामुळे तरी आता दिलासा मिळेल, अशी अपेक्षा शेतकरी व्यक्त करत आहेत.

गेल्या वर्षी अकोट तालुक्‍यात आंबीया बहारात संत्रा उत्पादक शेतकऱ्यांचे मोठे नुकसान झाले होते. या नुकसानीची भरपाई म्हणून विमा कंपन्यांकडून हेक्‍टरी १७ हजार ५०० रुपये शेतकऱ्यांच्या खात्यात जमा करण्यात आले; परंतु ही रक्कम काही राष्ट्रीयीकृत बॅंकांनी थेट कर्जखात्यात जमा केली. शेतकरी आपल्या खात्यातील पैसे काढण्यासाठी गेले असता हा प्रकार समोर आला होता.

त्यामुळे धास्तावलेल्या शेतकऱ्यांनी बॅंक अधिकाऱ्यांना विचारणा केली असता त्यांच्या खात्यात पैसे जमा केल्याचे बॅंकेकडून सांगण्यात आले. शेतकऱ्यांनी तत्काळ बॅंकेच्या वरिष्ठांना, पालकमंत्री, जिल्हाधिकारी, लीड बॅंक व्यवस्थापकांना निवेदने देत ही रक्कम बचतखात्यात वळती करण्याची मागणी केली.

प्रत्येक ठिकाणी आश्‍वासने मिळाले; मात्र अद्यापही पैसे वळते झाले नाहीत. नुकतीच या शेतकऱ्यांनी कृषिमंत्र्यांची भेट घेत निवेदन दिले. त्यांनी आपण वरिष्ठांशी बोलून तातडीने यावर मार्ग काढण्याची सूचना देणार असल्याचे शेतकऱ्यांना सांगितले आहे. आता तरी हे पैसे तातडीने मिळतील, असे शेतकऱ्यांनी सांगितले.

येत्या काही दिवसांत या भागातील केळी उत्पादकांना पीकविम्याची रक्कम मंजूर होण्याची शक्‍यता आहे. हाही निधी बॅंकांनी कर्जखात्यात जमा केला तर अधिकच बिकट परिस्थिती होईल. त्यामुळे संत्रा पीकविम्याचा विषय तातडीने सुटावा, अशी मागणी शेतकरी करत आहेत.