प्रमाणपत्र मिळालेले शेतकरी कर्जमाफीपासून दूरच

बुलडाणा : जिल्ह्यात ज्या २१ शेतकऱ्यांना कर्जमुक्तीचे प्रमाणपत्र समारंभपूर्वक वाटप केल्या गेले, त्यापैकी अाठ जणांना अद्यापही कर्जमाफी तर मिळाली नाहीच. शिवाय बँकांना पाठवलेल्या ग्रीन यादीत या अाठ शेतकऱ्यांचा समावेश नसल्याचा अारोप चिखलीचे अामदार राहुल बोंद्रे यांनी विधिमंडळाच्या नागपूर अधिवेशनात केला. कर्जमुक्तीचे प्रमाणपत्र दिलेल्यांना तरी कर्जमाफी मिळणार का, असा प्रश्नही त्यांनी शासनाला विचारला अाहे.

कर्जबाजारी असलेल्या शेतकऱ्यांना दिलासा देण्यासाठी शासनाने छत्रपती शिवाजी महाराज शेतकरी सन्मान योजना जाहीर केली. याला अाता सहा महिन्यांचा कालावधी उलटला तरीही शेतकऱ्यांना योजनेचा प्रत्यक्ष लाभ मिळाला नसल्याचे अा. बोंद्रे यांनी म्हटले.

शेतकऱ्यांचा वाढता रोष आणि विरोधकांकडून टीका होऊ नये म्हणून दिवाळीदरम्यान १८ ऑक्टोबर रोजी बुलडाणा जिल्ह्यातील २१ शेतकऱ्यांना कर्जमुक्त झाल्याचे प्रमाणपत्र कृषिमंत्री पांडुरंग फुंडकर यांच्या हस्ते देण्यात आले.

वास्तविक बुलडाणा जिल्ह्यात ज्या ग्रीन यादीनुसार कर्जमाफी देल्याचे घोषित केले, त्या ग्रीन यादीमध्ये कर्जमुक्तीचे प्रमाणपत्र वाटप केलेल्या शेतकऱ्यांपैकी आठ जणांची नावेच नाहीत. या आठ शेतकऱ्यांमध्ये चिखली मतदारसंघातील चांडोळ येथील विठ्ठलराव देशमुख, धनपाल मुरादे, चांधई-आंधई येथील दिलीप तवर या तीन शेतकऱ्यांचा समावेश अाहे.

या शेतकऱ्यांच्या संबंधित बँक शाखेत प्रत्यक्ष पाहणी केली असता त्यांच्या खात्यात कर्जमाफीची रक्कम जमा नसल्याचे अामदार बोंद्रे यांनी सभागृहाच्या निदर्शनास अाणून दिले. बुलडाणा जिल्ह्यात कर्जमाफी प्रमाणपत्र दिलेल्या शेतकऱ्यांसह इतरांची यादी पोर्टलवरून गायब करण्यात अाली. मुख्यमंत्र्यांच्या हस्ते कर्जमाफीचे प्रमाणपत्र दिलेल्या शेतकऱ्यांच्या खात्यातसुद्धा पैसे जमा झाले नाहीत.