जळगाव जिल्ह्यात १८२५ शेततळ्यांची कामे पूर्ण

जळगाव  ः मागेल त्याला शेततळे योजनेअंतर्गत जळगाव जिल्ह्यात दोन हजार शेततळी निर्माण करण्याचा लक्ष्यांक देण्यात आला होता. यापैकी आतापर्यंत १८२५ शेततळ्यांची कामे पूर्ण झाली आहेत. २८ शेततळ्यांची कामे सुरू आहेत.

 

या योजनेअंतर्गत जिल्ह्यातील शेतकऱ्यांना आतापर्यंत ८ कोटी ४७ लाख रुपयांचे अनुदान वाटप करण्यात आले आहे. जिल्ह्यात सर्वाधिक १११ शेततळी शिंदी (ता. चाळीसगाव) येथे तर नगाव (ता. अमळनेर) येथे ५५ शेततळी पूर्ण झाली आहे. यामुळे ही योजना शेतकऱ्यांना फायदेशीर ठरत आहे. 

 

२०१७-१८ या वर्षात जिल्ह्यात १२५१ शेततळे पूर्ण करण्यात आली. अनुदान म्हणून ५ कोटी ७६ लाख निधी दिला होता. यापैकी ५ कोटी ७० लाख रुपयांचे अनुदान शेतकऱ्यांच्या खाती जमा करण्यात आले आहेत. २०१६-१७ या वर्षात एकूण ५७४ शेततळी पूर्ण झाली आहेत. त्यासाठी प्राप्त झालेल्या २ कोटी ७६ लाखांचा निधी अनुदान म्हणून शेतकऱ्यांच्या खाती जमा करण्यात आला आहे, अशी माहिती जिल्हा प्रशासनाने जारी केली आहे.

 

या योजनेचा जिल्ह्यातील शेतकऱ्यांना लाभ मिळावा, याकरिता जिल्हाधिकारी किशोर राजे निंबाळकर यांनी कृषी विभागाच्या अधिकाऱ्यांशी संवाद साधून, वारंवार आढावा घेऊन जिल्ह्याला देण्यात आलेले उद्दिष्ट तातडीने पूर्ण करण्याचे आदेश दिले आहेत. त्यानुसार जिल्हा अधीक्षक कृषी अधिकारी विवेक सोनवणे, कृषी उपसंचालक अनिल भोकरे यांनी तालुका कृषी अधिकाऱ्यांना मार्गदर्शन करून जिल्ह्यात ही योजना प्रभावीपणे राबविण्यात येत आहे.