साताऱ्यात ११७७ शेततळ्यांची कामे पूर्ण

सातारा  ः मागेल त्याला शेततळे योजनेतून सातारा जिल्ह्यात ११७७ शेततळ्यांची कामे पूर्ण झाली आहेत. यापैकी १०६१ शेतकऱ्यांना अनुदानापोटी चार कोटी ८६ लाख रुपये वितरित करण्यात आले असल्याची माहिती कृषी विभागाच्या सूत्रांनी दिली.  

राज्य शासनाने फेब्रुवारी २०१६ मध्ये मागेल त्याला शेततळे ही योजना जाहीर केली आहे. या योजनेतून सातारा जिल्ह्यासाठी दोन हजार शेततळ्यांचे उद्दिष्ट ठेवण्यात आले होते. सुरवातीस जाहीर केलेल्या निकषांत बदल केल्याने ही योजना सर्वसमावेशक झाली होती. यामुळे शेतकऱ्यांचाही प्रतिसाद वाढला होता. या योजनेत आतापर्यंत ४८३६ अर्ज प्राप्त झाले आहेत. यामध्ये ३५५३ अर्ज पात्र तर १२१३ अर्ज अपात्र ठरले आहे. तसेच ७० अर्जांच्या छाननीचे काम सुरू आहे. पात्र अर्जापैकी २९६८ अर्जांना मंजुरी देण्यात आली. २४८१ शेततळ्यांची आखणी करून दिली आहे.

पावसामुळे शेततळ्यांच्या कामांचा वेग काहीसा कमी झाला होता. सध्या ७९ शेततळ्यांचे काम सुरू असून, ११७७ शेततळ्यांची कामे पूर्ण झाली आहेत. शाश्वत पाणीसाठ्यासाठी ही शेततळी फायदेशीर असली तरी राज्यातील इतर जिल्ह्याच्या तुलनेत शेतकऱ्यांच्या सहभाग कमी दिसून येत आहे. यासाठी कृषी विभागाने यायोजनेचा प्रसार आणि प्रचार करणे आवश्यक आहे.

तालुकानिहाय शेततळ्यांची पूर्ण झालेली कामे सातारा  ७२, कोरेगाव १६९, खटाव १५९, माण ३००, फलटण २५६, वाई ६३, खंडाळा ७३, महाबळेश्वर ३, जावली १६, पाटण ८, कऱ्हाड ५८.