अन्नदात्यासाठी राज्यभरात ‘अन्नत्याग’

पुणे ः राज्यातील पहिल्या शेतकरी आत्महत्येचा स्मृतीदिन आणि शेतकऱ्यांच्या पाठीमागे शक्ती उभी करण्याच्या उद्देशाने ‘एक उपवास अन्नदात्या’साठी हे अांदोलन सोमवारी (ता.१९) राज्यभरात झाले. साहेबराव करपे यांचे मूळ गाव असलेल्या चिलगव्हाण येथे त्यांना श्रद्धांजली वाहण्यात आली.  चिलगव्हाण (ता. महागाव, जि. यवतमाळ) येथे १९ मार्च १९८६ रोजी साहेबराव करपे यांनी कुटुंबासह आत्महत्या केली होती. देशातील ही पहिली शेतकरी आत्महत्या म्हणून नोंद झाली. या घटनेला ३२ वर्षे पूर्ण झाली आहेत. विदर्भात जनमंच, किसानपुत्र, भूमिपुत्र संघर्ष वाहिनी, शेतकरी जागर मंच यासह इतरही शेतकरी व सामाजिक संघटनांनी अन्नत्याग आंदोलनात भाग घेतला. चिलगव्हाण येथे आमदार राजेंद्र नजरधने यांच्या हस्ते (कै.) साहेबराव करपे यांच्या प्रतिमेचे पूजन करण्यात आले. पवनार (जि. वर्धा) येथे झालेल्या आंदोलनात अभिजित फाळके, ज्ञानेश वाकुडकर, अमर हबीब आदींचा सहभाग होता.    नगर येथे सरकारच्या धोरणाचा निषेध करत सुकाणू समितीच्या पदाधिकाऱ्यांनी एक दिवसाचे अन्नत्याग अांदोलन केले. अकोला जिल्ह्यात शेतकरी जागर मंच, लोकजागर परिवार, शेतकरी संघटनेच्या कार्यकर्त्यांनी अांदोलनात भाग घेतला.  बुलडाणा जिल्ह्यात सिंदखेडराजा तालुक्यातील सोयंदेव येथे पाचशे पेक्षा अधिक स्त्री-पुरुष एकत्र येत अांदोलनात सहभागी झाले. नांदेड, हिंगोली, परभणी, औरंगाबाद, उस्मानाबाद, लातूर, बीड, चंद्रपूर, भंडारा, गोंदिया, अमरावती, कोल्हापूर, पुणे, सांगली, जळगाव, धुळे आदी जिल्ह्यातदेखील आंदोलन झाले.