पुणे : प्रशांत महासागरातील ला-निना स्थिती निवळण्यास सुरवात झाली आहे. तरी समुद्र थंड असल्याने सध्या जागतिक तापमानही कमी आहे. यंदाचा फेब्रुवारी महिना २०१४ पासूनच्या चार वर्षांतील सर्वांत थंड ठरला आहे. तर डिसेंबर ते फेब्रुवारी या तीन महिन्यांचा हंगामही चार वर्षांत थंड होता, असे मत अमेरिकेतील नोआ संस्थेच्या राष्ट्रीय पर्यावरणीय माहिती केंद्राच्या शास्त्रज्ञांनी व्यक्त केले आहे. चार वर्षांत यंदाचा फेब्रुवारी थंड ठरला असला तरी, ‘नोआ’ने केलेल्या विश्‍लेषणानानुसार यंदाच्या फेब्रुवारी महिन्यातील तापमान विसाव्या शतकातील सरासरी (५३.९ अंश फॅरन्हाईट) तापमानापेक्षा १.१७ अंश फॅरेन्हाईटने जास्त आहे. हे १८८० ते २०१८ या १३९ वर्षांतील ११ वे उच्चांकी तापमान ठरले आहे. विसाव्या शतकातील सरासरी तापमानापेक्षा अधिक तापमान नोंदले गेलेल्या ३९८ महिन्यांमध्ये ४२ फेब्रुवारी महिन्यांचा समावेश आहे. उत्तर गोलार्धामध्ये फेब्रुवारी महिन्याच्या शेवटी हिवाळा ऋतूचा, तर दक्षिण गोलार्धात उन्हाळा ऋतूचा शेवट होतो. डिसेेंबर ते फेब्रुवारी या हंगामातील जागतिक तापमान २० व्या शतकातील सरासरी (५३.८ अंश फॅरेन्हाईट) तापमानापेक्षा १.२२ अंश फॅरेन्हाईटने अधिक असल्याचे दिसून आले आहे. या हंगामात नोंदले गेलेले तापमान आतापर्यंतचे ८ वे उच्चांकी तापमान ठरले असले, तरी २०१४ पासूनचे सर्वांत थंंड तापमान ठरले असल्याचे तज्ज्ञांनी स्पष्ट केले आहे. यंदाच्या फेब्रुवारीत धृवीय प्रदेशातील बर्फाचे अाच्छादन कमी असल्याचे दिसून आले आहे. यात आर्टिक समुद्रात १९९८ ते २०१० या कालावधीतील बर्फ आच्छादनापेक्षा ८.८ टक्क्यांनी कमी बर्फ होते. १९७९ नंतरच्या फेब्रुवारी महिन्यातील हे सर्वांत कमी अाच्छादन आहे. तर अंटार्टिक समुद्रामध्ये बर्फाचे अाच्छादन २५.४ टक्क्यांनी कमी असल्याचे दिसून आले असून, हे आतापर्यंतचे दुसरे सर्वांत कमी बर्फ ठरले आहे. २० आणि २१ फेब्रुवारी रोजी अंटार्टिका समुद्रात आतापर्यंतचे दुसऱ्या क्रमांकाचे तर यंदाच्या वर्षांतील सर्वांत कमी ८ लाख ४२ हजार मैल प्रदेशावर बर्फ होते. यंदाच्या फेब्रुवारीतील जमीन आणि समुद्राच्या जागतिक सरासरी तापमानाचा विचार करता आतापर्यंतचे १५ वा उष्ण तापमान ठरले असून, डिसेंबर ते फेब्रुवारी सातवा उष्ण हंगाम ठरला आहे. महिन्यातील समुद्राच्या पृष्ठभागाचे तापमान आतपर्यंत सातवे उष्ण असून, सहावा उष्ण हंगाम असल्याचे निरीक्षण तज्ज्ञांनी नोंदविले आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.