नाशिकला मेथीची आवक वाढली

नाशिक : नाशिक बाजार समितीत गत सप्ताहात मेथीची सरासरी १ लाख २५ हजार जुड्यांची आवक झाली. या वेळी मेथीला प्रतिशेकडा ४०० ते ६०० रुपये व सरासरी ५०० रुपये दर मिळाला. मागील पंधरवड्याच्या तुलनेत आवकेमध्ये ३ पटीने वाढ झाल्याचे बाजार समितीच्या सूत्रांनी सांगितले. सध्या वातावरण वाढीसाठी पोषक असल्याने मेथीची लागवड इतर ऋतूंच्या तुलनेत वाढते. सध्या मेथीची लागवड वाढल्याने नाशिक मार्केटमध्ये मेथीची आवक वाढली आहे. ऐरवी २५ ते ३० हजार जुड्यांची होणारी आवक तब्बल एक ते सव्वा लाख जुडीपर्यंत पोचली असल्याने मेथीच्या दरात घसरण झाली. हिवाळ्याच्या दिवसात सर्वांत जास्त खाल्ली जाणारी पालेभाजी म्हणून मेथीची ओळख आहे. हिवाळ्यातील वातावरण वाढीसाठी पोषक असल्याने मेथीची लागवड इतर ऋतूंच्या तुलनेत वाढते. खरिपाच्या हंगामातील पिके निघाल्यानंतर सिंचनाची सुविधा असलेल्या भागात पालेभाज्यांची लागवड मोठ्या प्रमाणात होते. विशेषतः दिंडोरी, निफाड, इगतपुरी आदी तालुक्यांत पालेभाज्यांची लागवड वाढते. त्यात हिवाळ्यात वाढती मागणी लक्षात घेऊन मेथीची लागवड केली जाते. हिवाळ्यात ही पालेभाजी चांगली फोफावत असल्याने तिच्या लागवडीवर भर दिला जातो. यंदा पाऊस चांगला पडलेला आहे. परतीच्या पावसाने खरिपाच्या हंगामातील पिकांचे नुकसान केले असले तरी या पाण्यामुळे विहिरी आणि बोअरवेलच्या पाण्याची पातळी वाढलेली आहे. त्यामुळे भाजीपाल्याच्या पिकाखालील क्षेत्रात वाढ झाली आहे. दरम्यान चालू सप्ताहातही मेथीची आवक वाढती राहील व मेथीचे दर गत सप्ताहासारखेच स्थिर राहतील, असा अंदाज बाजार समितीतील सूत्रांनी व्यक्त केला आहे. मेथीचे दर स्थिर काढणीस लवकर तयार होणाऱ्या पालेभाज्यांमध्ये मेथीची भाजी इतर भाज्यांच्या तुलनेत चांगली येते. त्यामुळे मेथीच्या लागवडीकडे शेतकऱ्यांचा कल असतो. पावसाळ्यात जास्त पाऊस पडल्यास मेथीचे सडण्याचे प्रमाण वाढते. तसेच काढणीच्या वेळी पाऊस असल्यास काढणी करणे मुश्किल होत असते. उन्हाळ्यात जास्त उन्हाच्या तडाख्यात मेथी पीक जळून जात असल्याने या काळात लागवड कमी होते. सध्या लागवड वाढल्यामुळे मेथीची आवकही वाढली आहे. नाशिक मार्केटमध्ये मागणी स्थिर असल्यामुळे मेथीचे दर स्थिर आहे. किरकोळ विक्रीत मात्र, मेथी १० ते १५ रुपये जुडी अशी विकली जात आहे. बाजार समितीत ४ ते ८ रुपये जुडी असा मेथीला दर मिळाला.