पन्नास लाख जणांना मुद्रा योजनेत कर्जवाटप

मुंबई : देशातील आर्थिक विषमता दूर करण्याच्या उद्देशाने पंतप्रधानांनी सुरू केलेली मुद्रा बँक योजना राज्यात प्रभावीपणे राबविण्यात येत आहे. योजनेतून मागील दोन वर्षांत ५० लाख ३८ हजार जणांना कर्जवाटप करण्यात आल्याची माहिती वित्त आणि नियोजनमंत्री सुधीर मुनगंटीवार यांनी दिली. यापुढील काळातही ही योजना प्रभावीपणे राबवून बेरोजगारांचे जीवनमान बदलण्यासाठी व्यापक प्रयत्न करण्यात येतील, असे त्यांनी या वेळी सांगितले.

मंत्री मुनगंटीवार यांच्या प्रमुख उपस्थितीत सह्याद्री राज्य अतिथिगृह येथे मुद्रा बँक योजनेच्या राज्यस्तरीय समन्वय समितीची बैठक झाली. या वेळी मुनगंटीवार म्हणाले, की गोरगरिबांना विनातारण आणि विनाजामीन कर्ज मिळावे यासाठी मुद्रा बँक योजना सुरू केली आहे. योजनेतून २०१६-१७ मध्ये १६.९ हजार कोटी रुपयांचे, तर २०११७-१८ मध्ये आतापर्यंत ८.८ हजार कोटी रुपयांचे कर्जवाटप करण्यात आले आहे. २०१६-१७ मध्ये ३३ लाख ४४ हजार, तर २०१७-१८ मध्ये आतापर्यंत १६ लाख ९३ हजार इतक्या बेरोजगारांना या योजनेतून व्यवसाय सुरू करण्यासाठी कर्ज दिले आहे. यापुढील काळातही मिशन मोडवर ही योजना राबवून जास्तीत जास्त बेरोजगारांना कर्ज आणि कोशल्य विकास प्रशिक्षण उपलब्ध करून दिले जाईल, असे त्यांनी या वेळी सांगितले.

नोकरी देणाऱ्यांची संख्या वाढावी नोकरी मागणाऱ्या हातांपेक्षा नोकरी देणाऱ्या हातांची संख्या वाढवणे गरजेचे आहे. या धोरणातूनच पुढे आलेल्या या योजनेला अधिक प्रभावी करण्यासाठी त्याची कौशल्य विकास विभाग, स्टार्टअप योजना, बचत गटविषयक विविध योजना यांच्याशी सांगड घालून पुढील आर्थिक वर्षातही ही योजना प्रभावीपणे राबविण्यात येईल, असे मुनगंटीवार म्हणाले.

बैठकीस आमदार अनिल सोले, वित्त विभागाचे अप्पर मुख्य सचिव डी. के. जैन, नियोजन विभागाचे अप्पर मुख्य सचिव देबाशीष चक्रवर्ती, कौशल्य विकास विभागाचे सचिव असीम गुप्ता, आयटी सचिव श्रीनिवासन, एसएलबीसीचे समन्वयक श्री. मस्के, ग्रामीण जीवनोन्नती कार्यक्रमाच्या मुख्य कार्यकारी अधिकारी आर. विमला यांच्यासह मुद्रा बँक योजनेच्या राज्यस्तरीय समन्वय समितीचे विविध सदस्य आदी उपस्थित होते.

योजनेचा उद्देश आर्थिक विषमता दूर करणे हा आहे. त्यासाठी राज्यातील विशेषतः मागास जिल्ह्यांतही योजना प्रभावीपणे राबविण्यात यावी. योजनेंतर्गत प्रशिक्षण, कार्यशाळा आणि डिजिटल तंत्रज्ञानाचा वापर यावरही भर देण्यात यावा. -सुधीर मुनगंटीवार , वित्त आणि नियोजनमंत्री