भरीत वांग्याचा हंगाम अंतिम टप्प्यात

जळगाव : राज्यात भरिताच्या हिरव्या आणि पाणीदार वांग्यांच्या उत्पादनासाठी प्रसिद्ध असलेल्या बामणोद व भालोद (ता. यावल), आसोदा, भादली (ता. जळगाव) या भागांत वांग्यांचा हंगाम अंतिम टप्प्यात आला आहे. आता पुढील वर्षाच्या हंगामाची तयारी शेतकरी करीत असून, पीक काढून क्षेत्र रिकामे करण्यास सुरवात झाली आहे.

भालोद, बामणोद, पाडळसे, आसोदा, भादली तसेच भुसावळ तालुक्‍यांतील वरणगाव, तळवेल भागांत भरिताच्या वांग्याची बऱ्यापैकी लागवड झाली होती. त्यांचे क्षेत्र तसे मर्यादित होते. नेमकी आकडेवारी कृषी विभागाकडे उपलब्ध नसली तरी सुमारे ६०० हजार हेक्‍टरवर लागवड लागवड झाली होती. ही लागवड पारंपरिक पद्धतीने जुलै महिन्यात झाली. उत्पादन यायला दिवाळीनंतर सुरवात झाली.

हव्याहव्याशा थंडीत ऊब देणारा मेनू म्हणजे भरीत, असे खानदेशवासी मानतात. त्यामुळे हुडहुडी भरविणाऱ्या थंडीत भरीत पार्ट्या रंगू लागल्या होत्या. परंतु मकरसंक्रांतीनंतर भरीत वांग्यांच्या पिकातही बदल होऊ लागतात. अर्थातच वांग्याचा आकार गोलाकार होणे, बिया अधिक निघणे, पाणीदारपणा कमी होणे, कडकपणा, अशा प्रकारचे वांगे येऊ लागले.

तसेच वांगी पक्व होण्यासही काहीसे अधिकचे दिवस लागत असल्याचे शेतकऱ्यांनी सांगितले. शिवाय जसे ऊन वाढते, तसे भरीत खाण्याचे प्रमाणही खानदेशात कमी होते. त्यामुळे हे बदल लक्षात घेता अनेक शेतकऱ्यांनी पीक काढून क्षेत्र रिकामे करायला सुरवात केली आहे.

तत्पूर्वी झाडावर पिवळी झालेली दर्जेदार वांगी तोडून ती वाळविली जात आहेत. वाळलेल्या वांग्यातून पारंपरिक पद्धतीने बिया काढल्या जात आहेत. त्या संकलित करून एका कापडात साठविल्या जात असून, पुढे मे महिन्याच्या अखेरीस त्यांची वाफ्यांमध्ये लागवड केली जाईल. रोपे तयार झाल्यानतंर त्यांची जुलैमध्ये लागवड होईल, असे शेतकरी नरेंद्र कोल्हे (बामणोद) यांनी सांगितले.