वर्धा येथे साकारला पहिला रुरल मॉल

वर्धा : ग्रामीण भागातील महिला बचत गट आणि शेतकऱ्यांच्या उत्पादनांना हक्‍काची बाजारपेठ उपलब्ध व्हावी, याकरिता राज्यातील पहिला रुरल (ग्रामिण) मॉल वर्धा येथे सुरू झाला. जिल्हाधिकारी शैलेश नवाल यांच्या पुढाकाराने उभ्या झालेल्या या मॉलमधून पहिल्या टप्प्यात 72 उत्पादनांची विक्री केली जात आहे.

ग्रामीण भागातील बचत गट; तसेच शेतकरी कंपन्यांच्या माध्यमातून विविध प्रकारच्या शेतमालावर प्रक्रिया करून त्याच्या विक्रीचा प्रयत्न होतो. काही शेतकऱ्यांनी आपल्या उत्पादनांचे ब्रॅंडिंगही केले. मात्र जिल्हा मुख्यालयी; तसेच मोठ्या शहरांमध्ये असलेल्या खासगी मॉलमध्ये त्यांच्या उत्पादनांना जागाच मिळाली नाही. परिणामी, अनेक दर्जेदार उत्पादन बंद झाली.

शेतकरी कंपन्या व बचत गटांच्या उत्पादनांच्या विक्रीची अडचण ओळखत जिल्हाधिकारी शैलेश नवाल यांनी वर्धा येथील मोक्‍याच्या ठिकाणी रुरल मॉल उभारण्याचा निर्णय घेतला. महिला आर्थिक विकास महामंडळ, कृषी समृद्धी प्रकल्पाचे गोवर्धन चव्हाण यांच्यावर या कामाची जबाबदारी सोपविण्यात आली.

गोदामाचे पालटले रुपडे रेल्वे स्थानक व बस स्थानकानजीक वखार महामंडळाचे बंद पडलेले गोदाम होते. त्याचे नूतनीकरण करण्याच्या सूचना महिला आर्थिक विकास महामंडळ, कृषी समृद्धी प्रकल्पातील अधिकाऱ्यांना देण्यात आल्या. एका अशासकीय संस्थेची मदतही नूतनीकरणाच्या कामात घेण्यात आली.

शेतकरी कंपनीकडे व्यवस्थापन रुरल मॉलचे व्यवस्थापन हिंगणी (ता. हिंगणघाट) येथील ग्रामोन्नती शेतकरी उत्पादक कंपनीकडे देण्यात आले आहे. शेतकरी कंपनी किंवा बचत गटांनी उत्पादित केलेल्या वस्तूंचे पॅकिंग करण्याची जबाबदारी महिला आर्थिक विकास महामंडळाकडे आहे. त्यापोटी 10 टक्‍के आकारणी महिला आर्थिक विकास महामंडळ करते. रुरल मॉलचे व्यवस्थापन करणारी शेतकरी उत्पादक कंपनी दहा टक्‍के कमिशन आकारते. अशाप्रकारे 20 टक्‍के कमिशनची आकारणी येथील वस्तूंवर होते, अशी माहिती गोवर्धन चव्हाण यांनी दिली.

मुख्यमंत्र्यांनी केले होते उद्‌घाटन महात्मा गांधी यांच्या जयंतीला 2 ऑक्‍टोंबर रोजी मुख्यमंत्री देवेंद्र फडणवीस यांच्या हस्ते या रुरल मॉलचे उदघाटन झाले. सद्यस्थितीत विविध प्रकारच्या 72 वस्तूंची विक्री मॉलमधून केली जात आहे. त्यासोबतच सेंद्रिय भाजीपालादेखील विक्रीसाठी उपलब्ध करण्यात आला आहे.