चर्चेला न ठेवताच विधेयके पटलावर : दिलीप वळसे-पाटील

मुंबई : विधेयके मंजूर करायची असतील तर चार दिवस अगोदर ती पटलावर आली पाहिजेत, त्यानंतर ती चर्चेला घ्यायची असतात; परंतु तसे न करता ही विधेयके, बिले घेण्यात आली आहेत. या पाच बिलांवर नापसंती ठराव आम्हाला द्यायचा आहे. त्यामुळे ती बिले चर्चेला घेऊ नयेत, अशी मागणी विधानसभेचे माजी अध्यक्ष दिलीप वळसे-पाटील यांनी मंगळवारी (ता.२७) सभागृहात केली.   मंगळवारच्या कामकाजामध्ये तीन ठराव दाखवले आहेत, यावर चर्चा कधी होणार आहे. कामकाज पत्रिका तयार करताना विधिमंडळातील सचिव मंडळाने जी खबरदारी घ्यायला हवी होती ती घेतली नाही, असा आक्षेप दिलीप वळसे पाटील यांनी या वेळी नोंदवला. ११ नंबरमध्ये ५ विधेयके दाखवली आहेत आणि ५ बिले मंजूर करण्याचेही दाखवले आहे. मी विधानसभा कामकाजातील १२३ कडे लक्ष वेधतो. विधेयके मांडताना ती चर्चेला कशी घ्यावीत. १२३ मध्ये त्याची नोंद आहे. त्यामुळे विधेयके मंजूर करायची आहेत तर चार दिवस अगोदर ती पटलावर आली पाहिजेत. त्यानंतर ती चर्चेला घ्यायची असतात; परंतु तसे न करताच ही बिले घेण्यात आली आहेत. त्यामुळे ५ बिलांवर सहानुभूतिपूर्वक विचार करावा, असेही दिलीप वळसे-पाटील म्हणाले. दिलीप वळसे-पाटील बोलत असतानाच अध्यक्ष हरिभाऊ बागडे त्यांना थांबवत होते. त्या वेळी वळसे-पाटील यांनी ‘तुम्ही मला बोलू देत नाही अध्यक्षमहोदय’...‘मग मी रागवतो’ अशा भाषेत आपला संताप व्यक्त केला. तर दुसऱ्यावेळी विधेयकाबाबत सांगत असतानाच अध्यक्ष हरिभाऊ बागडे यांनी मध्येच सांगण्याचा प्रयत्न केला असता, ‘मला बोलू द्या, तुम्ही माझे म्हणणे रेकॉर्डवरून काढून टाका मात्र माझा आवाज दाबू नका’...असे सुनावताच अध्यक्षांनी ‘तुमचा आवाज कोण दाबेल’ असे सांगितले. स्थगन प्रस्ताव फेटाळणे हा अधिकार अध्यक्षमहोदय तुम्हाला आहे; परंतु आज इतके महत्त्वाचे स्थगन प्रस्ताव येत असताना त्यांची भूमिका सभागृहासमोर यायला हवी होती, अशी नाराजी वळसे-पाटील यांनी व्यक्त केली.