सोलापूर, माढ्याच्या निकालाकडे देशाचे लक्ष

सोलापूर, माढ्याच्या निकालाकडे देशाचे लक्ष
सोलापूर, माढ्याच्या निकालाकडे देशाचे लक्ष

सोलापूर : अत्यंत प्रतिष्ठेच्या ठरलेल्या सोलापूर आणि माढा लोकसभा मतदारसंघांतून कोण विजयी होणार, याबाबतची उत्सुकता ताणली गेली असून, कार्यकर्त्यांच्या पैजावर पैजा लागल्या आहेत. या प्रतिष्ठेच्या लढतीच्या निकालांकडे देशाचे लक्ष आहे. आता गुरुवारी (ता. २३) होणाऱ्या मतमोजणीमुळे ही उत्सुकता संपणार आहे. 

दरम्यान, सोलापूर लोकसभेचा निकाल सायंकाळपर्यंत हाती येणार आहे. तर माढ्याचा निकाल मध्यरात्री उशिरा लागण्याची शक्‍यता आहे. सोलापुरातून माजी केंद्रीय मंत्री सुशीलकुमार शिंदे आणि वंचित बहुजन आघाडीकडून प्रकाश आंबेडकर, भाजपचे डॉ. जयसिद्धेश्‍वर शिवाचार्य महास्वामी अशी तिरंगी लढत आहे. माढ्यात भाजप-शिवसेनेचे रणजितसिंह नाईक निंबाळकर विरुद्ध राष्ट्रवादी कॉँग्रेसचे संजय शिंदे अशी थेट लढत होत आहे. 

गुरुवारी सकाळी आठ वाजेपासून माढा व सोलापूर मतदारसंघांची मतमोजणी रामवाडी गोदामात होणार आहे. मतमोजणीदरम्यान बंद पडलेल्या ईव्हीएममधील व्हीव्हीपॅटची मतमोजणी सर्वांत शेवटी केली जाणार आहे. सोलापूर लोकसभा मतदारसंघात मतमोजणीच्या सर्वांत कमी २० फेऱ्या शहर उत्तर मतदारसंघात होणार आहेत. सर्वाधिक २६ फेऱ्या अक्कलकोट विधानसभा मतदारसंघात होतील. 

‘शहर मध्य''मध्ये २२, दक्षिण सोलापूर, पंढरपूर व मोहोळ विधानसभा मतदारसंघांत प्रत्येकी २४ फेऱ्या होणार आहेत. माढा मतदारसंघातील सांगोला विधानसभा मतदारसंघात सर्वांत कमी २२ फेऱ्या होतील. सर्वाधिक २७ फेऱ्या माण विधानसभा मतदारसंघात आहेत. करमाळा मतदारसंघात २४, तर माढा, माळशिरस आणि फलटण विधानसभा मतदारसंघांत प्रत्येकी २५ फेऱ्या होणार  आहेत. 

माढ्याच्या प्रतिष्ठेचे काय?

राष्ट्रवादी कॉँग्रेसचे अध्यक्ष शरद पवार आणि मुख्यमंत्री देवेंद्र फडणवीस यांनी माढा मतदारसंघ अत्यंत प्रतिष्ठेचा केला. उमेदवारांपेक्षा  पवार आणि फडणवीस यांचीच प्रतिष्ठा यासाठी अधिक पणाला लागली. त्यामुळे माढा सर्वत्र चर्चेत आला.  सोलापूर मतदारसंघात सुशीलकुमार शिंदे यांना भाजपचे डॉ. महास्वामी लढत देणार होते. पण इथे ऐनवेळी वंचित बहुजन आघाडीकडून ॲड. प्रकाश आंबेडकर मैदानात उतरल्याने शिंदे यांची अडचण वाढली, पण दिग्गज उमेदवार आणि तिरंगी लढतीने इथेही लक्ष वेधले आहे. त्यामुळे या दोन्ही मतदारसंघांत गुलाल कोण उधळणार, याची उत्सुकता आहे.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com