पुणे ः उन्हाळ्यात जनावरांसाठी चाऱ्याची टंचाई भासू नये, म्हणून शेतकरी चारा पीक लागवडीची तयारी करू लागले आहेत. सध्या पाणी उपलब्ध असलेल्या भागात शेतकरी मका, कडवळ, नेपिअर ग्रास आदी पिकांची पेरणी करत आहे. पुणे विभागात आतापर्यंत २१७० हेक्‍टरवर चारा पिकांची लागवड झाली आहे. त्यामुळे उन्हाळ्यात चाऱ्याची टंचाई कमी होण्यास मदत होणार आहे.
गेल्या चार ते पाच वर्षांत पुणे विभागात मोठ्या प्रमाणात चाराटंचाई भासली होती. त्याची दखल घेऊन शासनाला चारा छावण्या सुरू कराव्या लागल्या होत्या. त्यातच पशुपालकांना चाऱ्यासाठी भटकंती करावी लागली होती. अशी परिस्थिती यंदा उद्‌भवू नये म्हणून शेतकरी काळजी घेऊ लागले आहे. वाळलेल्या चारा पिकांबरोबर हिरवा चाराही उपलब्ध व्हावा म्हणून शेतकरी मका, कडवळ, नेपिअरग्रास यासारख्या पिकांची पेरणी करत आहे.
ग्रामीण भागात अनेक सहकारी साखर कारखाने सुरू आहेत. त्यामुळे चाऱ्यासाठी शेतकरी उसाच्या वाड्याची खरेदी करून तो वाळविण्याचे नियोजन करीत आहे. मात्र उसाच्या वाड्याचा दर अधिक असल्याने काही शेतकरी मका, कडवळ पेरणीवर भर देत आहेत.
सध्या पुणे विभागात मका पिकाची ८२० हेक्‍टरवर तर कडवळाची ११६० हेक्‍टरवर पेरणी झाली आहे. लसूण घासाची अवघ्या दहा हेक्‍टरवर पेरणी झाली आहे. इतर चारा पिकांची १७० हेक्‍टरवर पेरणी झाली आहे.
विभागातील नगर जिल्ह्यात दहा तर सोलापूर जिल्ह्यात २१६० हेक्‍टरवर चारा पिकांची पेरणी झाली असल्याचे चित्र आहे. पुणे जिल्ह्यात अजूनही चारा पिकांची पेरणी झालेली नसल्याची माहिती कृषी विभागाच्या सूत्रांनी दिली.
