नगर जिल्ह्यात यंदा मुबलक चारा 

नगर: जिल्ह्यात यंदा मुबलक चारा उपलब्ध आहे. त्यामुळे साधारण जूनपर्यंत तरी चाराटंचाई भासणार नाही असे कृषी आणि पशुसंवर्धन विभागाच्या अहवालातून  स्पष्ट होत आहे. जिल्ह्यामध्ये १६ लाख ४८ हजार ५४८ जनावरे असून ६३ लाख ३३ हजार ५६७  मेट्रीक टन चारा उपलब्ध आहे. जून महिन्याच्या अखेरच्या टप्प्यात  मात्र दोन लाख १९ हजार १३३ मेट्रिक टन चाऱ्याची तूट भासण्याचा अंदाज व्यक्त केला आहे. 

ऊस पिकाचा जिल्हा अशी ओळख असलेल्या नगरमध्ये आता दुग्ध व्यवसाय वाढीस लागत आहे. मात्र मागील पाच ते सहा वर्षांच्या कालावधीतील दुष्काळी स्थितीचा दुग्ध व्यवसायावर गंभीर परिणाम झाला. चाराटंचाईमुळे जनावरे विकावी लागली. गेल्या दोन वर्षांपासून मात्र स्थिती चांगली आहे. यंदा तर पशुसंवर्धन विभागाच्या अहवालानुसार मुबलक चारा असल्याने अगदी जून महिन्याच्या शेवटच्या सप्ताहापर्यंत चारा उपलब्ध असेल.

२०१२ मधील १९ व्या पशुगणनेनुसार जिल्ह्यामध्ये मोठी १३ लाख ५९ हजार ०४८ तर लहान २ लाख ८९ हजार पाचशे अशी १६ लाख ४८ हजार ५४८ जनावरे आहे. मोठ्या जनावराला दर दिवसाला सहा किलो चाऱ्याप्रमाणे ८१५४ मेट्रीक टन तर लहान जनावरांना प्रतिदिन तीन किलो प्रती जनावराप्रमाणे ८६५.५ मेट्रीक टन चारा आवश्‍यक आहे. याशिवाय जिल्ह्यामध्ये असलेल्या शेळ्या-मेंढ्यासाठी दर दिवसाला सहा क्विंटल चाऱ्याची गरज आहे.

जून महिना अखेरचा विचार करता मोठ्या जनावरांना ५७ लाख २९ हजार ९४०६ तर लहान जनावरांना ५ लाख ७० हजार ६०४ टन, शेळ्या-मेढ्यासाठी २ लाख ५२ हजार ६९० टन चाऱ्याची गरज आहे. उपलब्ध असलेल्या ६३ लाख ३३ हजार ५६७  मेट्रीक टन चाऱ्यानुसार शेवटच्या टप्प्यात दोन लाख १९ हजार १३३ मेट्रीक टन चाऱ्याची तूट भासण्याचा अंदाज आहे. मात्र मागील काही वर्षांचा विचार करता यंदा मुबलक चारा उपलब्ध आहे, असे अहवालात नमूद केले आहे.