चारा दरात तेजी, कडबा दुरापास्त

जळगाव (प्रतिनिधी) ः जिल्ह्यात ज्वारीचा कडबा मिळणे दुरापास्त झाले आहे. दादरची कुट्टीही मिळत नसून, कुट्टी व कडब्याचे दरही वाढले आहेत. ज्वारीचा कडबा अडीच हजार रुपये शेकडा, तर दादरचा कडबा किमान साडेतीन हजार रुपये शेकडा आहे. चढ्या दरांचा फटका पशुधनपालकांना बसत असून, दुग्ध उत्पादकांना महागडा कोरडा चारा आणावा लागत आहे. थंडीच्या दिवसात किमान एक वेळ तरी कोरडा चारा पशुधनाला मिळायला हवा, असे शेतकरी मानतात. त्यातल्या त्यात ज्वारीचा चारा पोषक असतो. हा चारा आपल्याकडे असावा म्हणून दुग्ध उत्पादक ज्वारीचा कडबा खरेदी करीत असून, पुरेसा पाऊस झालेल्या सातपुडा पर्वतालगतच्या भागातून हा चारा मागवून घेतला जात आहे. जिल्ह्यात भुसावळ, मुक्ताईनगर, बोदवड, भडगाव, जामनेर, पाचोरा, जळगाव या भागांत ज्वारीचे पीक कमी पावसाने हातचे गेले होते. त्यामुळे कडबाही हवा तसा हाती आलेला नाही. दीड एकरात फक्त १०० ते १२५ पेंढ्या कडबा मिळाला. कारण ज्वारीच्या पिकात पावसाच्या लहरीपणामुळे तूट होती. अनेकांनी पीक मोडले होते. रावेर, यावल, चोपडा व अमळनेरच्या तापीकाठालगतच्या भागात काही शेतकरी ज्वारी पेरतात. याच शेतकऱ्यांचे उत्पादन तेवढे आले आहे. ज्वारीचे क्षेत्र ४० ते ४५ हजार हेक्‍टर असते, परंतु यंदा जेवढे क्षेत्र होते, त्यातून २० टक्केही चारा मिळाला नाही. ज्वारीचा कोरडा चारा संपत आला आहे. तर दादर (ज्वारी) रब्बी हंगामात असते. तिची कापणी व मळणी अजून सुरू व्हायची आहे. दादरचा कडबा फेब्रुवारीच्या मध्यात मिळू शकेल. अर्थातच सद्यःस्थितीत फक्त तुरीचा पाला, भुसा पशुधनासाठी मिळत आहे. तोदेखील हवा तेवढा नाही. दुग्ध उत्पादकांना हिरव्या चाऱ्याची व्यवस्था करून ठेवावी लागली आहे.

सध्या ज्वारीचा चारा मिळतच नाही. दादरची कुट्टी बाजार समितीनजीक विक्रेत्यांकडे मिळते. ट्रॉलीभर दादरची कुट्टी साडेसात हजार रुपयांपेक्षा अधिक दरात पडते. वाहतूक खर्च व कडबा कटर करायचा खर्च वेगळा लागतो. यंदा दुधाचे दरही संघांनी कमी केल्याने दुहेरी फटका बसू लागला आहे. - काशिनाथ चिंधू पाटील, दूध उत्पादक, कंडारी, जि. जळगाव