खानदेशात चाराटंचाईचे संकट

पशुधनाला कमी दरात चारापुरवठ्याची यंत्रणा उभारली पाहिजे. छावणीसाठी मंजुऱ्या का मिळाल्या नाहीत, हा प्रश्‍न आहे. कारण चारा पिकेही दुष्काळामुळे अपेक्षित प्रमाणात नाहीत. चारा महागला आहे. - आत्माराम पाटील,शेतकरी, कापडणे (जि. धुळे)
शेतकऱ्यांवर चाराटंचाईचे संकट
शेतकऱ्यांवर चाराटंचाईचे संकट

जळगाव : खानदेशातील पशुधनाच्या रोजच्या गरजेपेक्षा ३० ते ३५ टक्के चारा कमी उपलब्ध आहे. पुरेसा चारा पशुधनास उपलब्ध करताना शेतकरी मेटाकुटीस आले आहेत. महाग चारा घेण्याची वेळ दूध उत्पादकांवर आली आहे. 

खानदेशातील धडगाव व अक्कलकुवा (जि. नंदुरबार) हे तालुके वगळता सर्वत्र दुष्काळी स्थिती आहे. प्रकल्पांमधील एकूण जलसाठा १२ टक्‍क्‍यांवर आहे. शिंदखेडा, अमळनेर, पारोळा, जामनेर, बोदवड, साक्री, धुळे, नंदुरबार या भागांत फेब्रुवारीपासून चाराटंचाई वाढली. शासनाने नंदुरबार, धुळे व जळगावात १० हजार हेक्‍टरवर चारा लागवडीसाठी हिवाळ्यात प्रयत्न सुरू केले.

पशुसंवर्धन विभागाने सुमारे २४ हजार शेतकऱ्यांना खानदेशात ५० हजार किलो, तर कृषी विभागाने सुमारे ४० हजार शेतकऱ्यांना बियाण्याचे वाटप केले. खानदेशात लहान, मोठे मिळून सुमारे १५ लाख पशुधन आहे. त्यात दुधाळ पशुधनाचाही समावेश आहे. सुमारे ३२ लाख मेट्रिक टन चारा वर्षाकाठी लागतो. सर्व पशुधनास रोज आठ हजार मेट्रिक टनांपेक्षा अधिक चारा लागतो. परंतु, एवढा चारा पशुधनास उपलब्ध करून देणे दुष्काळामुळे अशक्‍य झाले आहे. सर्वत्र चाराटंचाई आहे. 

दादर (ज्वारी) चा कडबा दुरापास्त झाला आहे. खानदेशात ऊस अत्यल्प क्षेत्रात होता. त्यापासून नगण्य चारा उपलब्ध झाला. रब्बी हंगाम जेमतेम राहिला. यामुळे ज्वारी, बाजरी व मक्‍याचा कडबा, गव्हाची काड, हरभऱ्याचा भुसाही अपेक्षित आला नाही. मक्‍याचा कडबा २५०० रुपये, दादरचा कडबा पाच हजार रुपये, तर बाजरीचा कडबा २५०० ते ३००० रुपये प्रतिशेकडा आहे. कडब्याचे दर २० ते २५ टक्‍क्‍यांनी वधारले आहेत. दुधाळ पशुधनाला पुरेसा चारा उपलब्ध करून देताना अधिकचा खर्च दूध उत्पादकांना करावा लागत आहे. चारा छावण्या व दावणीला चारा देण्याची शेतकऱ्यांची मागणी आहे.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com