सांगली जिल्ह्यात जानेवारीतच चाराटंचाईचे सावट

सांगली ः  दुष्काळी पट्ट्यातील आटपाडी व कवठेमहांकाळ तालुक्‍यातील निम्म्या भागात पंधरा दिवस पुरेल इतका चारा उपलब्ध आहे. जानेवारीतच या भागात चाराटंचाई निर्माण झाली आहे. त्यामुळे पूर्ण उन्हाळा कसा जाईल, हा प्रश्न शेतकऱ्यांसमोर आहे. सध्या पशुपालकांना चारा विकत घेण्यासाठी कऱ्हाड (जि. सांगली) येथे जावे लागत आहे.  दुष्काळी भागात बहुशांत शेतकरी चारापिकांची लागवड करतात. त्यामुळे जनावरांना चारा उपलब्ध होतो. मात्र, यंदा आटपाडी तालुक्‍याच्या पश्‍चिम भागात परतीचा पाऊस झाला नाही. त्यामुळे शेतकऱ्यांनी पेरलेल्या चारापिकांची अपेक्षित वाढ झालीच नाही. पीकच आले नाही, त्यामुळे चारा कमी प्रमाणात उपलब्ध झाला. परिणामी जानेवारीतच चाराटंचाई भासू लागली आहे. कवठेमहांकाळ तालुक्‍यात ज्या ठिकाणी पाणी आहे, त्या ठिकाणी चारा आहे. परंतु हा चारा कमी पडत असल्याने उसाचा चारा शोधण्यासाठी सांगली पशुपालक येऊ लागले आहेत.  ऊस वाडे शेकड्यास ८०० ते ९०० रुपये आटपाडी व कवठेमहांकाळ तालुक्‍यात चाराटंचाई निर्माण झाली आहे. सध्या साखर कारखाने सुरू आहेत. त्यामुळे उसाचे वाडे विक्रीसाठी दुष्काळी भागात ट्रक भरून दाखल होऊ लागले आहेत. आटपाडी तालुक्‍यात कऱ्हाड (जि. सातारा) या, तर सांगली जिल्ह्यातील मिरज, वाळवा, पलूस, कडेगाव या भागांतून ओला चारा येऊ लागला आहे. उसाच्या वाड्यास प्रतिशेकड्यास ८०० ते ९०० रुपये असा सध्या दर आहे. जत तालुक्‍यात मुबलक चारा जत तालुक्‍यात परतीचा पाऊस झाल्याने तलावामध्ये पाणीसाठा आहे. शेतकऱ्यांनी चारापिकांची लागवड केली आहे. रब्बी हंगामातील पिकेही चांगली आहेत. त्यामुळे जत तालुक्‍यात चारा मुबकल असल्याने पशुपालकांमध्ये समाधानाचे वातावरण आहे.