पुणे जिल्ह्यात चाराटंचाई

पुणे   ः पुणे जिल्ह्यातील पूर्व पट्ट्यात पावसाचा खंड पडल्यामुळे शेतकऱ्यांसमोर चाराटंचाईचा मोठा प्रश्न उभा राहिला आहे. त्यामुळे जनावरांची कमी दराने विक्री होत असल्याचे चित्र आहे.

यंदा हवामान विभागाने चांगल्या पावसाचा अंदाज वर्तविला होता. परंतु प्रत्यक्षात मोठ्या प्रमाणात पावसाचा खंड पडल्याने खरीप पिके वाया गेली. पश्चिम पट्ट्यात झालेल्या पावसामुळे धरणे भरली असली, तरी त्याचा उपयोग पिण्याच्या पाण्यासाठी अधिक होणार आहे. त्यामुळे शेतीसाठी धरणातून पाणी कमी प्रमाणात उपलब्ध होईल. परतीचा पाऊस झाल्यास जानेवारीपर्यंत हिरवा चारा उपलब्ध असतो. मात्र, यंदा पावसाच्या खंडामुळे सुरवातीपासून चारापिकांचे प्रमाण अत्यंत कमी राहिले आहे. पावसावर उगवलेला चाराही आता वाळू लागला आहे. त्यामुळे येत्या काळात जनावरांच्या चारा-पाण्याची सोय कशी करायची, असा प्रश्न शेतकऱ्यांसमोर उभा राहिला आहे. यंदा जिल्ह्यात पाणीटंचाईबरोबर जनावरांच्या चाऱ्याचा प्रश्न गंभीर बनणार असल्याचे चित्र आहे.  

पावसाअभावी चारा उपलब्ध नसल्याने दुभत्या जनावरांसह बैलजोडीसाठी चाऱ्याचा खर्च वाढला आहे. त्यामुळे उत्पन्नापेक्षा खर्च अधिक होत असल्याने शेतकरी जनावरांची विक्री करत आहे. सध्या बाजारात जनावरांची कमी दराने विक्री होत असून, ५० ते ६० हजार रुपये किमतीच्या बैलजोडीची मागणी ३० ते ४० हजारांत व्यापाऱ्यांकडून होत आहे. गाय, म्हैस यांसारख्या दुभत्या जनावरांच्या दराचीही अशीच काहीशी परिस्थिती आहे.

पावसाळा संपल्यानंतर शेतकऱ्यांना जूनपर्यंत जनावरांसाठी सुक्या चाऱ्यांची सोय करावी लागते. यंदा बाजरीच्या कडब्यालाही हजार ते बाराशे रुपये शेकडा एवढा भाव आला आहे. ज्वारी कडब्याचा दर तीन ते साडेतीन हजार रुपयांपर्यंत वाढला आहे. पावसाअभावी शेतीमालातून केलेला खर्चही निघू न शकल्याने जनावरांच्या चाऱ्यासाठी पैसा आणायचा कोठून असा प्रश्न शेतकऱ्यांपुढे उभा राहिला आहे.