पश्‍चिम बंगालमध्ये मांस प्रक्रिया युनिटची स्थापना

कोलकाता ः पश्चिम बंगाल सरकारने नादिया जिल्ह्यातील हरीणघाटामध्ये बकरीच्या मांसावर प्रक्रिया करण्यासाठी अन्नप्रक्रिया युनिट स्थापन केले आहे. बकरीच्या मांसाला बंगालमध्ये मोठ्या प्रमाणात मागणी आहे. या युनिटमुळे मांसाची मागणी काही प्रमाणात पूर्ण होणार आहे.

पश्‍चिम बंगाल लाइव्ह स्टॉक डेव्हलपमेंट कॉर्पोरेशनने दोन एकर क्षेत्रावर हे अन्नप्रक्रिया युनिट उभारले आहे. या प्रकल्पासाठी तीन कोटी रुपये मंजूर करण्यात आलेले आहेत. सहा तासांच्या एका शिफ्टमध्ये एका वेळेला ३०० बकऱ्यांच्या मासांवर प्रक्रिया करण्याची क्षमता या प्रकल्पात आहे. या प्रकल्पातून मिळणारे मांस ५०० ग्रॅम आणि एक किलोमध्ये उपलब्ध होणार आहे.

या प्रकल्पाची दर दिवसाची २.५ टन मांसनिर्मिती क्षमता आहे. या संदर्भातील मुख्य प्रकल्प यशस्वी झाल्यानंतर या प्रकल्पाची निर्मिती करण्यात आली आहे. या प्रकल्पाअंतर्गत हरीणघाटामधील दुकांमध्ये बकरीचे मांस उपलब्ध होणार आहे. प्रकल्प पूर्ण क्षमतेने सुरू झाल्यानंतर राज्यातील २४० आउटलेट्समधून मांस विक्री करण्यात येणार आहे.