पुण्यात परदेश दौऱ्यासाठीच्या अर्जाची सोमवारी सोडत

पुणे  ः  जिल्ह्यातील शेतकऱ्यांना परदेशात अभ्यास दौऱ्यासाठी कृषी विभागामार्फत पाठविण्यात येणार आहे. त्यासाठी नुकतेच अर्ज मागविण्यात आले होते. या अर्जाची जेष्ठता सुची तयार करण्यासाठी सोमवारी (ता.६) दुपारी तीन वाजता विभागीय कृषी विस्तार केंद्र शिवाजीनगर येथे सोडत कार्यक्रम आयोजित केली आहे.   पुणे जिल्ह्यातील विविध पिकांची उत्पादकता, पीक पद्धतीमधील आधुनिक तंत्रज्ञान, कृषी उत्पादनाचे बाजार व्यवस्थापन, निर्यातीच्या संधी, कृषी प्रक्रियेतील अद्यावत पद्धती यामध्ये आमूलाग्र बदल आणण्यासाठी शेतकऱ्यांचे देशाबाहेर अभ्यास दौरे ही राज्य पुरष्कृत योजना राबविण्यात येत आहे. विविध देशांनी विकसित केलेल्या शेतीविषयक तंत्रज्ञान व तेथील शेतकऱ्यांनी त्याचा केलेला अवलंब व त्याद्वारे त्याच्या उत्पादनात झालेली वाढ याबाबत त्या-त्या देशांतील शास्त्रज्ञांशी प्रत्यक्ष चर्चा, क्षेत्रीय भेटी तसेच संबधित संस्थांना भेटी याद्वारे शेतकऱ्यांचे ज्ञान व क्षमता उंचावण्यासाठी अभ्यास दौरे आयोजित केले जाते.  त्यासाठी जिल्हयातील ४९६ शेतकऱ्यांनी या अभ्यासदौऱ्यासाठी अर्ज केलेले आहेत. शासनाच्या सुचनेनुसार या अर्जातून पात्र शेतकऱ्यांची लॉटरी पद्धीतीने जेष्ठता सुची करण्याचे निर्देश दिले आहे. त्यासाठी लॉटरी पद्धतीने जेष्ठता सूची तयार करण्यात येणार आहे. तरी अर्जदार शेतकऱ्यांच्या सक्षम लॉटरी पद्धतीने सोडत असल्याने सर्व अर्जदार शेतकऱ्यांनी उपस्थित राहण्याचे आवाहन कृषी विभागाच्या वतीने करण्यात आले आहे.