यवतमाळ जिल्ह्यात तुरळक गारपीट, वीज कोसळून चौघांचा मृत्यू

यवतमाळ : जिल्ह्यात रविवारी (ता. १५) दुपारी चारच्या सुमारास पावसापासून बचावासाठी झाडाखाली उभे असलेल्या आठ जणांच्या अंगावर वीज कोसळली. या घटनेत चौघांचा मृत्यू झाला, तर उर्वरित चार जण गंभीर जखमी झाले.

यवतमाळ जिल्ह्यातील महागाव तालुक्‍यात रविवार (ता.१५) दुपारी वादळी-वाऱ्यासह पावसाने हजेरी लावली. हिवरा, कारंजखेड परिसरात तुरळक गारपीट झाली. महागाव तालुक्‍यातील वेणी बु. (सवना) शिवारात विजेने तांडव घातले. शेळ्या चारणाऱ्या काही जणांसह शेतमजुरांनी पावसापासून बचावाकरिता प्रल्हाद रामटेके यांच्या शेतातील निंबाच्या झाडाचा आसरा शोधला होता. परंतु पावसापासून बचावासाठीचा हा आसराच काळ ठरेल, अशी कल्पनाच या सर्वांना नव्हती. दुपारी ४ वाजताच्या सुमारास या झाडावर वीज कोसळली. या घटनेत झाडाखाली असलेल्या आठ जणांपैकी चौघांचा जागेवरच मृत्यू झाला. उर्वरित चौघे जखमी झाले. यासोबतच वीज कोसळण्याची दुसरी घटना यवतमाळ जिल्ह्यातील बोरी अरब गावात घडली. या घटनेत सात शेळ्या ठार झाल्या.

मृत्यमुखी - १) प्रभाकर नारायण जाधव (वय ४२), २ मुले, एक मुलगी, पत्नी. २) पंडित दिगांबर हरणे (वय ३३), २ मुले, पत्नी. ३) अनिल विष्णू सरगुळे (वय २२) अविवाहित. ४) लक्ष्मण रमेश चोपडे, (वय २४) अविवाहित, शेतमजूर. जखमी १) जितेंद्र सुरदुसे (वय २३, वाकोडी) २) बंडू सूर्यभान सरकाळे (वय ३२, रा. वेणी) ३) कैलास उत्तम सुरोशे (वय २३, रा. वेणी) ४) दत्ता गोविंद मदने (वय २३, रा. वेणी) ५) शिवाजी संभाजी बगळे (वय २६, रा. वेणी)

विदर्भात पावसाची हजेरी विदर्भातील अमरावती, यवतमाळ जिल्ह्यात ठिकठिकाणी झालेल्या गारपीट व पावसामुळे भाजीपाला उत्पादकांचे मोठे नुकसान झाले. अमरावती जिल्ह्यात ब्राह्मणवाडा थडी (ता. चांदुरबाजार) परिसरात गारपीट झाली. या भागातील भाजीपाला उत्पादकांचे नुकसान झाले. यवतमाळ जिल्ह्यातदेखील तुरळक पाऊस आणि गारपिटीची नोंद झाली.