राष्ट्रीय महामार्गाचे चौपदरीकरण आॅक्टोबरमध्ये सुरू होण्याची शक्यता

जळगाव : जळगाव आणि धुळे जिल्ह्यांतून जाणाऱ्या राष्ट्रीय महामार्ग क्रमांक सहाचे चौपदरीकरण येत्या ऑक्‍टोबरच्या अखेरीस सुरू होईल, अशी शक्‍यता आहे. सध्या काम रखडतच सुरू असले तरी, या कामासाठी वाळू पुरवठा सुरळीत ठेवण्याची तयारी प्रशासनाने केली आहे. या कामाला गती मिळण्यासाठी केंद्र स्तरावरूनही कार्यवाही केली जाईल, अशी शक्‍यता आहे.

बुलडाणा जिल्ह्यातील चिखलीपासून जळगाव जिल्ह्यातील तरसोदपर्यंत आणि तरसोदपासून धुळे जिल्ह्यातील फागणेपर्यंत चौपदरीकरणासाठीची कार्यवाही जिल्हा प्रशासन व राष्ट्रीय महामार्ग प्राधिकरण करीत आहे. दोन वेगवेगळे कंत्राटदार त्यासाठी नियुक्त केले आहेत. या कामांसाठी भूसंपादनाची प्रक्रिया पार पडली आहे. चिखली ते तरसोद यादरम्यानच्या कामाची सुरवात बऱ्यापैकी झाली आहे. महामार्गासाठी संपादित केलेल्या जमिनीत खुणा केल्या आहेत (मार्कींग). अनेक ठिकाणी महामार्गाआड असलेले वृक्ष तोडणे, सपाटीकरण आदी कामही सुरू आहेत.

तरसोद ते पाळधी यादरम्यानचा बायपास जळगावनजीक असून, यादरम्यान पाळधीनजीक संपादीत जागेत सपाटीकरण, मुरूम टाकण्याचे काम वेगात सुरू होते. पावसाळा सुरू होताच काम मंदावले. पुढे दसरा सणानंतर या कामाला गती देण्यासाठी प्रशासनाने वाळू कोठून मिळेल, तिची उपलब्धता, गरज याबाबत चर्चा केली. सुमारे २० ते २२ हजार ब्रास वाळूची गरज या कामासाठी भासेल.

संपादीत जमिनीत पिके

महामार्गासाठी संपादीत जमिनीत मुक्ताईनगर, भुसावळ, जळगाव, धरणगाव, पारोळा, धुळे आदी तालुक्‍यांमध्ये अनेक शेतकऱ्यांची पिके आहेत. ती ऑक्‍टोबरपर्यंत हाती येतील. ज्या शेतकऱ्यांची केळी व इतर फळ पिके आहेत, ती मात्र काढून फेकली जातील. कारण संबंधित संपादीत जमिनीच्या क्षेत्रात पिके घेण्याची परवानगी शेतकऱ्यांना नाही. या जमिनीचा मोबदला या शेतकऱ्यांना दिल्याचे प्रशासनाचे म्हणणे आहे.