मका बियाणे खरेदीत फसवणूक : शेतकऱ्याची तक्रार

जळगाव  ः मका बियाण्यांसंबंधी फसवणूक झाल्याने आर्थिक नुकसान सहन करावे लागल्याची तक्रार गोद्री (ता. जामनेर, जि. जळगाव) येथील शेतकरी दिलीप गुमानसिंग पवार यांनी तहसीलदार व पंचायत समितीकडे केली आहे.

२७ मार्च रोजी जामनेरातील एका कृषी केंद्रातून स्वीट कॉर्न मक्‍याचे एक किलो बियाणे २२५० रुपयांना घेतले. त्याची दीड एकरात चार बाय पावणेचार फूट अंतरात ठिबकवर २८ मार्चला लागवड केली. मक्‍याची वाढ चांगली झाली. एका झाडाला चार कणसेही लागली, पण कणसात दाणे भरले नाहीत. एका कणसात फक्त पाच ते सहा दाणे आहेत. त्यानंतर कृषी केंद्रातूच खते व विद्राव्य खते घेतली. त्यासाठी किमान १५ हजार रुपये खर्च आला. याबाबतची तक्रार संबंधित बियाणे कंपनीकडे केली, पण कंपनीने आपला दोष नसून तो कृषी केंद्रचालकाचा आहे. केंद्रचालकास ते बियाणे विक्री न करण्याचे बजावले होते, असे बियाणे कंपनीच्या प्रतिनिधीने म्हटले आहे.

कृषी केंद्रचालकाकडे यासंदर्भात माहिती दिली, परंतु ते ही दखल घ्यायला तयार नाही. या प्रकारामुळे मोठे नुकसान झाले आहे. कृषी विभाग, तहसीलदारांकडे तक्रार केली आहे. त्यांनी पाहणी करायचे आश्‍वासन दिले आहे. मक्‍याला दाणेच न लागल्याने अपेक्षित उत्पादन येणार नाही, हे स्पष्ट आहे. त्यामुळे नुकसान भरपाई मिळावी, अशी मागणी शेतकरी पवार यांनी केली आहे.