ऊसतोड मजूर महामंडळाला शंभर कोटींचा निधी ः पंकजा मुंडे

बीड   : याआधीच्या सरकारने दहा वर्षांत अडीच लाख घरे बांधली, आमच्या सरकारने दोन वर्षांत दोन लाख ६२ हजार घरे बांधली. दुष्काळी पार्श्वभूमीवर जलयुक्त शिवार योजना राबविल्याचे परिणाम दिसत आहेत. बीड जिल्ह्यात चार वर्षांत एकही टँकर सुरू करावा लागला नाही. गोपीनाथराव मुंडे यांच्या नावाने सुरू होत असलेल्या ऊसतोड मजूर महामंडळासाठी शंभर कोटी रुपयांच्या निधीची तरतूद केली जाईल. मजुरांना योजनांसह बैलजोडी आणि ट्रॅक्टर खरेदीसाठी त्यातून कर्ज मिळेल असे, प्रतिपादन ग्रामविकास, महिला व बालविकासमंत्री पंकजा मुंडे यांनी केले.

सावरगाव (ता. पाटोदा) येथे गुरुवारी (ता. १८) आयोजित दसरा मेळावा आणि संत भगवानबाबा यांच्या स्मारक लोकार्पण कार्यक्रमात त्या बोलत होत्या. पशुसंवर्धनमंत्री महादेव जानकर, जलसंधारणमंत्री राम शिंदे, करवीर पिठाचे शंकराचार्य विद्यानृसिंह भारती, खासदार डॉ. प्रीतम मुंडे, संत तुकाराम महाराज यांचे वंशज संभाजी महाराज मोरे, शांतीगिरी महाराज, डॉ. विरुपाक्ष शिवाचार्य महाराज, नांदेडच्या गुरुद्वाराचे ज्ञानी सरबजितसिंगजी, संत नामदेव महाराज यांचे वंशज महादेव महाराज नामदास, नारायणगडाचे मठाधिपती शिवाजी महाराज, अखिल भारतीय वारकरी महामंडळाचे अध्यक्ष प्रकाश महाराज बोधले, आमदार सुरेश धस, भीमराव धोंडे, संगीता ठोंबरे, लक्ष्मण पवार, आर. टी. देशमुख, शिवाजी कर्डिले, सुरजितसिंह ठाकूर, मोनिका राजळे, स्नेहलता काजळे, मोहन फड, नरेंद्र दराडे, विनायक पाटील, प्रज्ञाताई मुंडे, भागवत कराड, रमेश आडसकर उपस्थित होते. या वेळी ज्ञानेश्वरी वाचत असलेली संत भगवान बाबा यांची २५ फूट मूर्ती असलेल्या स्मारकाचे लोकार्पण करून त्याला भगवान भक्तिगड असे नामकरण करण्यात आले.