पुणे विभागात ‘जलयुक्त’साठी १५४ कोटींचा निधी

पुणे  ः पाणीटंचाईवर मात करण्यासाठी शासनामार्फत जलयुक्त शिवार अभियान हाती घेण्यात आले आहे. हे अभियान राबविण्यासाठी यंदा पुणे विभागात ५९९ गावे निवडण्यात आली असून, या गावांकरिता शासनाने १५४ कोटी रुपयांचा निधी मंजूर केला आहे. त्यामुळे या गावात जलसंधारणाची कामे वेगाने होण्यास मदत होणार आहे.

गेल्या दोन वर्षांपासून विभागातील सोलापूर, सातारा, सांगली, कोल्हापूर, पुणे या जिल्ह्यांत जलयुक्त शिवार अभियान राबविण्यात येत आहे. या अभियानाअंतर्गत पाणलोट विकासाची कामे, साखळी सिमेंट बंधारे, नालाबंधाऱ्याची कामे, नाला खोलीकरण, रुंदीकरण, जुन्या जलसंरचनांचे पुनरुज्जीवन, पाझर तलाव, लघुसिंचन तलाव दुरुस्ती, नूतनीकरण व क्षमता पुनर्स्थापित करणे, पिण्याच्या पाण्याचे स्रोत बळकट करणे अशी विविध कामे करण्यात येत आहेत.

यंदा निवडलेल्या गावांतील प्रतिनिधींना गावाचे आराखडे तयार करण्यासाठी प्रशिक्षण देण्यात येत आहे. त्यानंतर संबधित गावांचे आराखडे तयार करण्यात येऊन या गावांत ‘जलयुक्त’ची कामे केली जाणार आहेत. त्यामुळे भविष्यातील पाणीप्रश्न काहीसा कमी होणार आहे.

२०१६-१७ मध्ये विभागातील ८२५ गावे या अभियानासाठी निवडली होती. त्यामध्ये ४९  हजार ५४३ कामे प्रस्तावित केली होती. त्यापैकी ४८ हजार ६७६ कामे पूर्ण झाली असून ८६७ कामे प्रगतिपथावर आहेत. त्यावर ६७३ कोटी ८५ लाख रुपयांचा खर्च झाला आहे. २०७१-१८ मध्ये ८२३ गावांची निवड करण्यात आली होती.

या गावामध्ये एकूण २७ हजार २०० कामे प्रस्तावित केली होती. त्यापैकी १६ हजार १३० कामे पूर्ण झाली असून ७ हजार ७३९ कामे प्रगतिपथावर आहेत. त्यावर १०२ कोटी ४० लाख रुपयांचा खर्च झाला आहे. चालू वर्षी निवडलेल्या गावांमध्ये पावसाळ्यापूर्वी किवा पावसाळ्यानंतर कामे केली जाणार आहेत. त्यासाठी मंजूर झालेला निधी खर्च करण्यात येणार आहे; तसेच पूर्वीच्या रखडलेल्या कामांसाठीही हा निधी वापरता येणार आहे, अशी माहिती पुणे विभागीय कार्यालयाच्या सूत्रांनी दिली.