कार्तिक वारीत स्वच्छतेला प्राधान्य द्या : जिल्हाधिकारी

सोलापूर: आषाढीवारी प्रमाणे कार्तिकवारीत पंढरपुरात स्वच्छता महत्वाची असल्याने सर्व यंत्रणांनी स्वच्छतेला प्राधान्य देवून त्याप्रमाणे नियोजन करावे, अशा सूचना जिल्हाधिकारी डॉ. राजेंद्र भोसले यांनी सोमवारी (ता. २३) येथे दिल्या. येत्या ३१ ऑक्‍टोबर २०१७ रोजी पंढरपुरात कार्तिक वारीचा सोहळा संपन्न होणार असून या निमित्ताने जिल्हाधिकारी डॉ. भोसले यांच्या अध्यक्षतेखाली जिल्हाधिकारी कार्यालयात कार्तिक वारी नियोजनासंदर्भात सर्व संबंधित विभागाची बैठक संपन्न झाली, त्यावेळी ते बोलत होते. बैठकीस निवासी उपजिल्हाधिकारी अजित रेळेकर, अतिरिक्त पोलीस अधीक्षक मिलींद मोहिते, पंढरपूरचे उपविभागीय अधिकारी डॉ. विजय देशमुख, जिल्हा पुरवठा अधिकारी श्रीमंत पाटोळे यांच्यासह संबंधित विभागाचे अधिकारी उपस्थित होते. जिल्हाधिकारी डॉ. भोसले म्हणाले, कार्तिकवारीत पंढरपुरात वारकरी-भाविक मोठ्या प्रमाणात येत असतात. येणाऱ्या वारकरी-भाविकांना समाधान वाटावे अशा प्रकारे स्वच्छतेचे नियोजन करावे. यामध्ये स्वयंसेवी संस्था, शाळा-महाविद्यालयांचाही सहभाग घ्यावा, असेही त्यांनी सांगितले. ``वारकऱ्यांसाठी स्वच्छ पिण्याचे पाणी, शौचालय व्यवस्था, आरोग्य सेवा, पुरेसा औषधसाठा या बाबी महत्त्वाच्या असून संबंधित यंत्रणांनी यासाठी दक्ष राहावे. महावितरणने या कालावधीत शहरात व ६५ एकर येथे अखंडित वीजपुरवठा सुरळीत राहील, याबाबत दक्षता घ्यावी. अन्न व औषध प्रशासन विभागाने फेरीवाले, हॉटेल यांच्याकडील अन्नपदार्थांची तपासणी करावी. नगर परिषदेने धोकादायक इमारतींमध्ये वारकरी-भाविक वास्तव्यास राहणार नाहीत याबाबत खबरदारी घ्यावी. गर्दीच्या मार्गावरील सर्व अतिक्रमणे हटविण्याबाबतही नगरपालिकेने कारवाई सुरू करावी. मंदिर समितीने दर्शनमंडप, स्काय वॉक, पत्राशेड, दर्शन रांगेत वारकऱ्यांना देण्यात येणाऱ्या सुविधा याबाबत नियोजन करावे. महाराष्ट्र एसटी महामंडळाने आवश्‍यक असणाऱ्या जादा एसटी बसचे नियोजन करावे. वारीकालावधीत अवैध प्रवासी वाहतुकीस आळा घालण्यासाठी प्रादेशिक परिवहन विभागाने सर्व संबंधितांना सूचना द्याव्यात,`` अशा सूचनाही जिल्हाधिकारी डॉ. भोसले यांनी बैठकीत दिल्या.