नागपूर ः मसालावर्गीय पिकात समावेशीत असलेल्या आल्याने या आठवड्यात चांगलाच भाव खात दरात मोठी मुसंडी मारली आहे. आल्याचे दर गेल्या आठवड्यात सुरवातीला ३००० ते ३२०० रुपये क्‍विंटल होते. लग्नसराईमुळे मागणी वाढल्याने आणि आवक मंदावल्याने तेजी आली आहे. आल्याचे दर कळमणा बाजार समितीत ४००० ते ५००० रुपये क्‍विंटलवर पोचले आहेत. विदर्भात सर्वदूर उन्हाचा पारा ४५ अंश सेल्सिअसच्या पार गेला आहे. सूर्य आग ओकत असतानाच सर्वदूर भाजीपाल्याला मागणी वाढत त्याचेही दर वाढीस लागले आहेत. आल्याचे दर ३००० ते ३२०० रुपये क्‍विंटलवरून थेट ४००० ते ५००० रुपये क्‍विंटलवर पोचले. लसणाचे दर १५०० ते २५०० रुपये क्‍विंटलचे गेल्या आठवड्यात होते. त्यात घसरण होत हे दर १००० ते २५०० रुपयांवर पोचल्याची माहिती व्यापारी सूत्रांनी दिली. पांढऱ्या कांद्याच्या दरातही गेल्या आठवड्याच्या तुलनेत घट नोंदविण्यात आली आहे. सुरवातीला पांढरा कांदा ६०० ते ७०० रुपये क्‍विंटल होता. २८ एप्रिल रोजी पांढऱ्या कांदयाचे दर ४०० ते ७०० रुपये क्‍विंटलपर्यंत खाली आले. लाल कांदा ८०० ते १००० रुपये क्‍विंटल होता. त्याच्या दरातही घसरण झाली असून लाल कांदयाचे व्यवहार ६०० ते ९०० रुपये क्‍विंटलने होत आहेत. टोमॅटोचे व्यवहार ६०० ते ८०० रुपये क्‍विंटलने गेल्या आठवड्यात होत होते. २८ एप्रिल रोजी टोमॅटोची १०० क्‍विंटल आवक होत दर ७०० ते १००० रुपये क्‍विंटलवर पोचले. चवळी शेंगाची पण बाजारात आवक होत असल्याचे व्यापाऱ्यांनी सांगीतले. १४० ते १५० क्‍विंटल अशी चवळी शेंगाची रोजची आवक आहे. सुरवातीला १५०० ते २००० रुपये क्‍विंटल असलेले चवळी शेंगाचे दर मध्यंतरी घसरत १००० ते १५०० रुपये क्‍विंटलवर पोचले. त्यानंतर आता पुन्हा १५०० ते २००० रुपये क्‍विंटलने चवळी शेंगांचे व्यवहार होत आहेत. ज्वारीची जेमतेम आवक २००० ते २४०० असा सुरवातीचा दर असलेल्या ज्वारीचे व्यवहार नजीकच्या काळात २००० ते २२०० रुपयांने होत असल्याची माहिती व्यापारी सूत्रांकडून देण्यात आली. ज्वारीची आवक ५ ते १७ क्‍विंटल अशी जेमतेम आहे. सरबती गहू २५०० ते २८०० रुपये क्‍विंटल होता. आता २५०० ते २९०० रुपयांपर्यंत गहू वधारला. सरबती गव्हाची ५०० ते ५५० क्‍विंटल अशी सरासरी आवक आहे. हरभरा दर ३००० ते ३२०० रुपये क्‍विंटल आहेत. तूरीची व्यवहार ३२०० ते ३९०० रुपये क्‍विंटलने होत आहेत. गेल्या आठवडाभरापासून अपवाद वगळता तूर खरेदी याच भावाने होत आहे. कळमणा बाजार समितीत सोयाबीनची सरासरी २५० क्‍विंटल आवक आहे. ३२०० ते ३६०० रुपये क्‍विंटलने सोयाबीन चे व्यवहार झाले.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.