गिरणा धरणाचे पाणी जळगाव हद्दीत पोचले

गिरणा धरणाचे पाणी जळगाव हद्दीत पोचले
गिरणा धरणाचे पाणी जळगाव हद्दीत पोचले

जळगाव : रब्बी हंगामासाठी हतनूर धरणातून तीन, तर वाघूर धरणातून दोन आवर्तने सोडली जाणार आहेत. वाघूर धरणातून पाणी सोडण्यासंबंधी प्रशासन लवकरच जिल्हा प्रशासनाशी चर्चा करून निर्णय घेईल. गिरणा धरणातून मागील आठवड्यात नदीत पिण्याचे पाणी व कूपनलिका, विहिरींच्या पुनर्भरणासंबंधी आवर्तन सोडले असून, हे पाणी जळगाव तालुक्‍याच्या हद्दीत दाखल झाले आहे, अशी माहिती मिळाली.

हतनूर धरणातून रब्बीसाठी तीन आवर्तनांची मागणी लाभक्षेत्रातील शेतकऱ्यांनी केली आहे. तसा ठराव पाटबंधारे विभागाकडे या शेतकऱ्यांनी दिला आहे. हतनूरमध्ये १०० टक्‍के जलसाठा होता. तो घटला असून, ९० टक्‍क्‍यांपर्यंत आहे. धरणात गाळ अधिक असल्याने जलसाठा पुरेसा नसल्याचे प्रशासनाचे म्हणणे आहे. परंतु यंदा शेतकऱ्यांची मागणी व आवर्षणप्रवण स्थिती लक्षात घेता तीन आवर्तनांच्या मागणीवर शेतकरी ठाम असून, शेतकऱ्यांची मागणी प्रशासन मंजूर करणार असल्याची माहिती सूत्रांनी दिली. पुढील आठवड्यात हतनूरमधून रब्बीसाठी आवर्तन सोडले जाईल, असे सांगण्यात आले.

हतनूर धरणातील पाण्याचा लाभ चोपडा, रावेर, यावल या तालुक्‍यांना अधिक होतो. हतनूरमधून पिण्याच्या पाण्यासाठी व औद्योगिक वापरासाठीदेखील आवर्तन सोडावे लागते.

वाघूर धरणात सध्या ४२ टक्के जलसाठा आहे. या धरणातून रब्बीसाठी तीन आवर्तने सोडणे शक्‍य नाही. कारण औद्योगिक वापरासह जळगाव व जामनेर शहराच्या पिण्याच्या पाण्याचा पुरवठा वाघूरवर अवलंबून आहे. पण भुसावळ व जळगाव तालुक्‍यांतील शेतकऱ्यांनी नुकतीच जिल्हाधिकाऱ्यांची भेट घेऊन रब्बीसाठी पाण्याची मागणी केली.

जिल्हा परिषदेचे सदस्य लालचंद पाटील, मिलिंद चौधरी, राजेंद्र चौधरी, धनराज कोल्हे, शंकर शिंदे आदींनी जिल्हाधिकारी यांच्याशी रब्बीच्या पाण्यासंबंधी चर्चा केली. त्यावर जलसंपदा विभागाशी लवकरच चर्चा करून रब्बीसाठी पाणी सोडले जाईल, असे आश्‍वासन जिल्हाधिकाऱ्यांनी शेतकऱ्यांना दिले असून, दोन आवर्तने रब्बीसाठी हतनूरमधून मिळतील, अशी माहिती मिळाली.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com