साडेतीन हजार उचल द्या : शेतकरी संघटना

कोल्हापूर  :  यंदाच्या हंगामासाठी साडेतीन हजार पहिली उचल विभागातील साखर कारखान्यांनी द्यावी, या मागणीसाठी शेतकरी संघटनेच्या वतीने बुधवारी (ता. २५) दुपारी प्रादेशिक साखर सहसंचालक कार्यालयासमोर निदर्शने आणि कार्यालयात ठिय्या आंदोलन करण्यात आले. उसाच्या राज्यबंदी निर्णयाचा संघटनेच्या वतीने निषेध करण्यात आला. ‘हुतात्मा’ कारखान्याने ३३५५ रुपये उच्चांकी दर दिला, मग त्यापेक्षा जास्त उतारा असणाऱ्या कोल्हापुरातील कारखान्यांना अडचण काय, याबाबत आपण काय केले, अशी विचारणा युवा शेतकरी संघटनेचे जिल्हाध्यक्ष अ‍ॅड. माणिक शिंदे यांनी केली. मागील हंगामातील कमी दिलेला दर तातडीने द्यावा व या हंगामासाठी साडेतीन हजार रुपये पहिली उचल द्या, अन्यथा आंदोलन तीव्र करण्याचा इशारा शिंदे यांनी दिला. याबाबतचे निवेदन प्रादेशिक साखर सहसंचालक सचिन रावल यांना देण्यात आले. आंदोलनात महादेव कोरे, अजित पाटील, आदम मुजावर, मुन्ना सय्यद, हणमंतराव पाटील, गुणाजी शेलार, टी. आर. पाटील आदी उपस्थित होते.