तूर नोंदणीपासून वंचित ठेवल्याचा खुलासा द्या

नगर : शेवगाव बाजार समितीअंतर्गत सुरू असलेल्या शासकीय तूर खरेदी केंद्राच्या शासन नियुक्त सहकारी संस्थेच्या कार्यालयामध्ये कागदपत्रे देऊनही ऑनलाइन नोंदणी न करता शासकीय तूर विक्रीपासून वंचित ठेवले असल्याच्या तक्रारी बोधेगाव व अधोडी (ता. शेवगाव) येथील शेतकऱ्यांनी सहायक निबंधकांसह पणनमंत्र्यांकडे केल्या होत्या. या तक्रारीवरून बाजार समितीच्या सचिवांना लेखी खुलासा देण्याचे आदेश देण्यात आले आहेत.  शेतीमालाला हमीभाव मिळावा व व्यापाऱ्यांकडून होणारी लूट थांबावी या उद्देशाने शासन निर्णयानुसार शेवगाव कृषी उत्पन्न बाजार समिती आवारातील जगदंबा महिला सहकारी संस्थेमार्फत सुरू असलेल्या तूर खरेदीत वंचित ठेवल्याचा प्रकार नुकताच उघड झाला होता. बोधेगाव येथील दत्तात्रय घोरतळे, सुभाष घोरतळे, परमेश्वर तांबे, भागवत घोरतळे, साईनाथ पोटभरे, नितीन घोरतळे आदी शेतकऱ्यांनी संस्थेच्या आखेगाव रस्त्यावरील कार्यालयात तूर विक्रीकरतिा ऑनलाइन नोंदणी करण्यासाठी कागदपत्रे दिले. त्या वेळी त्यांना संबधितांनी पोच देण्यास नकार दिला होता. तूर आणण्यासाठी खरेदीचा दिनांक व वेळेची माहिती मोबाईलवर ‘एसएमएस’द्वारे न आल्याने तीन मे रोजी शेतकऱ्यांनी संस्थेकडे चौकशी केली असता नोंदणी न झाल्याचे स्पष्ट झाले होते. त्यामुळे शेतकऱ्यांनी शेवगाव येथील सहायक निबंधकांकडे लेखी तक्रार दिली होती. त्यांनी सदर निवेदनाच्या प्रती कृषी व पणनमंत्री, महसूल व मदत पुनर्वसनमंत्री, पणन संचालक, जिल्हाधिकारी, जिल्हा उपनिबंधक, तहसीलदार आदींनाही पाठवल्या होत्या. याबाबत ‘ॲग्रोवन’ने वृत्त प्रसिद्ध केले होते. त्यामुळे सहायक निबंधकांनी दखल घेऊन शेवगाव कृषी उत्पन्न बाजार समितीच्या सचिवांकडे तक्रारीच्या अनुषंगाने सहकारी संस्था कार्यालयास खुलासा मागवला आहे. आता याबाबत काय कारवाई होते याकडे शेतकऱ्यांचे लक्ष लागले आहे.