जाहीर केलेला हप्ता द्या ः राजू शेट्टी

जाहीर केलेला हप्ता द्या ः राजू शेट्टी
जाहीर केलेला हप्ता द्या ः राजू शेट्टी

कोल्हापूर : कोल्हापुरातील साखर कारखान्यांनी जाहीर केलेल्या पहिल्या हप्त्यात कपात करून प्रतिटन २५०० रुपये शेतकऱ्यांच्या खात्यावर वर्ग केले आहेत. याचा तीव्र विरोध करण्यासाठी स्वाभिमानी शेतकरी संघटनेच्या वतीने शनिवारी (या.१७) प्रादेशिक साखर सहसंचालक कार्यालयावर मोर्चा काढण्यात आला. कारखान्यांनी जाहीर हप्ता दिला नाही, तर शेतकऱ्यांच्या रोषाला सामोरे जावे लागेल, असा इशारा खासदार राजू शेट्टी यांनी या वेळी दिला. श्री. शेट्टी म्हणाले, की कोल्हापूर व सांगली जिल्ह्यातील साखर कारखान्यांनी साखरेच्या दराचे कारण पुढे करून बेकायदा शेतकऱ्यांच्या ऊस बिलातून प्रतिटन सरासरी ५०० रुपये कपात करून खात्यावर प्रतिटन २५०० रुपये बहुसंख्य कारखान्यांनी वर्ग केले आहे. नोव्हेंबर महिन्यात ऊस आंदोलन पेटल्यावर पालकमंत्री चंद्रकांत पाटील यांच्या मध्यस्थीने एफआरपी + २०० रुपये असा सर्वाच्या अनुमते निर्णय घेण्यात आलेला होता. सांगली व कोल्हापूर जिल्ह्यातील साखर कारखान्यांनी परस्पर बैठक घेऊन शेतकऱ्यांना विश्वासात न घेता कपातीची घोषणा केली. सरकारच्या चुकीच्या धोरणामुळे साखरेचे दर कोसळले आहेत. या निर्णयामुळे शेतकऱ्यांना २०० कोटी रुपयांचा फटका बसलेला आहे. स्वाभिमानी शेतकरी संघटना एक रुपयाही कमी घेणार नाही. साखरेचे दर पाडण्यास सरकारी धोरण कारणीभूत आहे. प्रत्येक वेळी आमच्यावरच अन्याय का. साखर कारखान्यांनी जेवढी पहिली उचल ठरलेली आहे, तेवढी रक्कम शेतकऱ्यांना दिली पाहिजे.  ‘‘ठराविक साखर कारखानदार आणि सरकार यांच्या मिलीभगतमुळेच साखरेचे दर पाडले गेले आहेत. कायद्याचे उल्लंघन करणाऱ्या किती साखर साखर कारखान्यांवर आपण कारवाई केली आहे, याचा लेखी खुलासा त्वरित करावा, तसेच ज्या साखर कारखान्यांनी कपात केली आहे, त्या साखर कारखान्यांवर त्वरित कडक कारवाई करावी, तसेच शेतकऱ्यांच्या खात्यावर विनाकपात बिल अदा करण्यात यावे. याचा निर्णय त्वरित झाला नाही, तर शेतकऱ्यांच्या रोषाला सरकारला सामोरे जावे लागेल,’’ असा इशाराही त्यांनी या वेळी दिला. या वेळी सावकार भगवान काटे, सावकार मादनाईक यांच्यासह कार्यकर्ते उपस्थित होते.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com