दूध पावडरला प्रतिकिलो ५० रुपये अनुदान देण्याची मागणी

संग्रहित छायाचित्र
संग्रहित छायाचित्र

इस्लामपूर, जि. सांगली  ः दूध पावडरसाठी प्रतिकिलो ५० रुपये व दूध उत्पादकास प्रतिलिटर पाच रुपयांचे अनुदान द्यावे, अशी मागणी महाराष्ट्र राज्य दूध संघ कृती समितीने माजी केंद्रीय कृषिमंत्री शरद पवार यांच्या नेतृत्वाखाली मुख्यमंत्री देवेंद्र फडणवीस यांच्याकडे केली, अशी माहिती कृती समितीचे अध्यक्ष विनायकराव पाटील यांनी दिली.

शुक्रवारी (ता. २९) आयोजित पत्रकार परिषदेत त्यांनी ही माहिती दिली. ते म्हणाले, की राज्य दूध संघ कृती समितीतर्फे दूध व्यवसायातील समस्यांवर चर्चा झाली. खासगी व सहकारी दूध संघांकडे ४० हजार टन दूध पावडर व दहा हजार टन बटर शिल्लक आहे. बाजारपेठेत १०० रुपये प्रतिकिलो कमी दर मिळत आहे. ग्राहकांकडून मागणीही नाही. राज्यातील दुग्ध व्यवसायावर परिणाम झाला आहे. स्थिती अशीच राहिल्यास व्यवसाय अडचणीत येऊ शकतो. पावडरला ५० रुपये व बटरसाठी ७५ रुपये प्रतिकिलो अनुदान व निर्यातीस प्रोत्साहन म्हणून २० टक्‍के इन्सेंटिव्ह मिळण्याची मागणी केली आहे.

राज्याने मागणी मान्य केल्यास दूध पावडर व बटरचा साठा संपेल. नव्याने निर्मिती केलेला साठाही विकला जाईल. पावडर व बटरमुळे शीतगृहे व गोदामे १०० टक्के भरलीत. अनुदान मिळाल्यास ती रिकामी होतील. यापुढे व्यवसायाला चांगले दिवस येतील म्हणून दुग्ध उत्पादकांसाठी अनुदानाची मागणी श्री. पवार यांच्या नेतृत्वाखाली केली. श्री. पवार व मुख्यमंत्री फडणवीस यांच्यात सकारात्मक चर्चा झाली. त्यांनी लवकरच दूध उत्पादकांच्या दृष्टीने योग्य निर्णय घेण्याचे सूचित केले आहे.

गोपाळराव मस्के, कात्रज दूध संघाचे अध्यक्ष विनायक हिंगे, व्यवस्थापक डॉ. विवेक क्षीरसागर, ‘गोकुळ’चे संचालक अरुण डोंगळे, जनरल मॅनेंजर आर. सी. शहा, सोनाई परिवाराचे दशरथ माने, चितळे डेअरीचे श्रीपाद चितळे व शासनाचे प्रमुख अधिकारी किरण कुरुंदकर यांचा शिष्टमंडळात समावेश होता. संचालक शशिकांत पाटील, कार्यकारी संचालक सुरेश पटेल या वेळी उपस्थित होते.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com