‘गोकुळ’कडून गाईच्या दूधदरात दोन रुपयांची कपात

कोल्हापूर : दूध उत्पादक शेतकऱ्यांच्या हितापेक्षा स्वहिताला प्राधान्य देत अखेर कोल्हापूर जिल्हा दूध उत्पादक संघाने (गोकुळ) गाईच्या दूध खरेदी-विक्री दरात दोन रुपयांची कपात केली आहे. आज (ता. २१)पासून याची अंमलबजावणी होणार आहे.  ‘गोकुळ''मध्ये मंगळवारी झालेल्या संचालक मंडळाच्या बैठकीत हा निर्णय झाला. त्यामुळे गाईच्या दुधाचा प्रतिलिटर दर २५ रुपयांवरून २३ रुपये, तर विक्री दर ४४ रुपयांवरून ४२ रुपये होणार आहे. संघाने कार्यक्षेत्राबाहेरील प्रतिलिटर दूध खरेदीदर १८ रुपये करण्याचा निर्णयही या वेळी घेण्यात आला. बैठकीच्या अध्यक्षस्थानी अध्यक्ष विश्‍वास पाटील होते.  दुधाला दर मिळावा यासाठी राज्यभर शेतकऱ्यांनी आंदोलन केले होते. हे आंदोलन शांत होते न होते तोवरच दूध कपातीचा निर्णय घेतल्याने राज्यभर याचे पडसाद उमटण्याची शक्‍यता आहे. शेतकरी आंदोलनाची दखल घेत शासनाने गाय व म्हैशीच्या दूध खरेदीदरात वाढ केली. सरकारच्या निर्णयामुळे गाईचा दूध खरेदीदर प्रतिलिटर २५ वरून २७ रुपये, तर म्हशीचा दुधाचा दर ३४ रुपयांवरून ३६ रुपये झाला. मात्र एक महिन्याच्या आतच राज्यातील दूध संघांनी दरकपात करण्याचा निर्णय घेतला. त्यानुसार ‘गोकुळ''नेही दरकपात जाहीर केली आहे. पश्चिम महाराष्ट्राचे प्रतिनिधित्व करणाऱ्या गोकुळनेच खरेदी- विक्री दरात २ रुपये कमी केल्याने आता इतर दूध संघ ही या दूध संघाची री ओढण्याची शक्यता निर्माण झाली आहे.