'गोकुळ'समोर विश्‍वासार्हता टिकविण्याचे आव्हान

गोकुळ दूध संघ इमारत
गोकुळ दूध संघ इमारत

कोल्हापूर : पश्‍चिम महाराष्ट्रातील लाखो दूध उत्पादकांचा आधार असलेले कोल्हापूर जिल्हा दूध उत्पादक संघ (गोकुळ) शेतकऱ्यांच्या संसाराचा आधार आहे. पण गेल्या काही दिवसांपासून याच ‘गोकुळ’च्या प्रश्‍नावरून जिल्ह्यातील दोन पारंपरिक विरोधक एकमेकाला भिडले आहेत.

या दोघांकडून राजकीय अस्तित्व टिकविण्यासाठी गोकुळच्या व्यवस्थापनाचा वापर करून घेतला जात आहे. यामुळे दूध प्रश्‍नावरून चर्चेत असणारा हा संघ आता राजकीय टीका टीप्पणीवरून कुप्रसिद्ध असून अशा स्थितीत गोकुळसमोर विश्वासार्हता टिकविण्याचे आव्हान आहे.

दरम्यान एकमेकांची जिरवण्यासाठी गोकुळचा कारभार ‘लक्ष्य’ केला जात आहे. यावरून संघात होणाऱ्या भ्रष्टाचाराचेही जाहीर धिंडवडे काढले जात आहेत. यामुळे सामान्य दूध उत्पादक व्यथितच होत आहे. माजी आमदार महादेवराव महाडिक यांची एकहाती सत्ता असलेला गोकुळचा दूध संघ. तर त्यांचे कट्टर विरोधक असलेले माजी मंत्री व विद्यमान आमदार सतेज पाटील यांच्यात हा संघर्ष सुरू आहे.

इतर राजकीय गोष्टींचे भांडवलापेक्षा गोकुळचा कारभारच या दोघांच्या सत्तासंघर्षात केंद्रस्थानी आला आहे. याच प्रश्‍नावरून सतेज पाटील यांनी सोमवारी हजारो शेतकऱ्यांचा मोर्चा गोकुळवर काढून ताकद दाखविण्याचा प्रयत्न केला. पण या मोर्चाला केराची टोपली दाखवत गोकुळच्या व्यवस्थापनाने त्याला सामोरे न जाण्याची भूमिका घेत उत्पादकांच्या प्रश्‍नापेक्षा राजाकरण किती महत्त्वाचे, याची प्रचिती दिली. शिळ्या कढीला नवा ऊत गोकुळमधील भ्रष्टाचार नवा नाही.

‘तळे राखील तो पाणी चाखील’ या उक्तीप्रमाणे जो संचालक होतो. तो पहिल्यांदा स्वत:च फायदा करून घ्यायला पाहतो. विविध कामासांठी स्वत:चे टेंडर भरणे, नातेवाइकांची टॅंकर दूध संघासाठी वापरून फायदा करून देणे, संचालकांना नियमित पाकिटे पोच होणे, गोकुळच्या पैशावर एेषोआरामात आयुष्य जगणे, यामध्ये अनेक संचालकांनी कुप्रसिद्धी मिळविली आहे. काही जाणकार संचालक वगळता व्यवस्थापनात सुधारणेपेक्षा केवळ संचालक होऊन लाभ मिळविण्याचाच प्रयत्न राहिला आहे.

काही निर्णय ‘तेरी भी चूप मेरी भी चूप’ अशा पद्धतीने होतात. तर काही निर्णयाबाबत मतभेद झाले, की ते वृत्तपत्रापर्यंत पोचवून एकमेकांच्यावर कडी करण्याचा प्रयत्न केला जातो. अशा कारभारातूनच आता सतेज पाटील यांच्या रूपाने एक नवा विरोधक सामोरा आला आहे.त्यामुळे गोकुळ पुढे आता विश्‍वासार्हता टिकविण्याचे आव्हान निर्माण झाले आहे.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com