दूध दरावरून ‘गोकुळ’च्या आजी-माजी पाटलांत शब्दयुद्ध

कोल्हापूर ः पश्‍चिम महाराष्ट्रातील राजकारणाचे एक प्रमुख केंद्र असलेल्या कोल्हापूर जिल्हा सहकारी दूध संघात (गोकुळ) सध्या गायीच्या दूध दरवाढीवरून आजी व माजी अध्यक्षांत चांगलाच संघर्ष सुरू आहे.

शासनाने दोन वेळा दूध खरेदी दरवाढ करूनही ‘गोकुळ’च्या व्यवस्थापनाने उत्पादकांना पूर्ण दरवाढ दिलेली नाही. उलट पशुखाद्याचे दर वाढविले आहेत. ‘गोकुळ’कडून गायीच्या दुधासाठी ३ रुपये ३० पैसे, तर म्हशीच्या दुधासाठी प्रतिलिटर १ रुपये ३० पैसे कमी दिले जात आहेत. त्यामुळे दूध दरवाढीसाठी ‘गोकुळ’विरोधात लढा उभा करावा लागेल, असा इशारा माजी अध्यक्ष दिलीप पाटील यांनी दिला आहे.

तर संघ आम्ही योग्यरीतीने चालवत आहोत. त्याचा ताळेबंद मांडलेला असतो. त्यामुळे माजी अध्यक्ष दिलीप पाटील यांनी केलेले आरोप राजकीय हेतूने प्रेरित आहेत. त्यांची दखल आम्ही घेत नाही. संघ हा दूध उत्पादक शेतकऱ्यांच्या हितासाठी आहे. तो तोट्यात जावा, असा कारभार आम्ही करणार नाही, असा पलटवार अध्यक्ष विश्‍वास पाटील यांनी केला आहे.

चार दिवसांपूर्वीच कर्नाटक सीमेवर असणाऱ्या कर्नाटक हद्दीतील गावांना दूध संघ गायीच्या दुधाला कमी दर देत असल्याबद्दल तेथील शेतकऱ्यांनी गोकुळ कार्यालयावर मोर्चा काढून संचालक व व्यवस्थापकीय मंडळाला जाब विचारला होता. दर का कमी याचे समाधानकारक उत्तर न देता आल्याने सध्या गोकुळचे प्रशासन सीमाभागातील शेतकऱ्यांच्या टीकेचा धनी बनले आहे.

याच पार्श्‍वभूमीवर गोकुळचे अध्यक्ष राहिलेल्या दिलीप पाटील यांनी गोकुळच्या दरकपातीच्या निर्णयाला विरोध करत आपण अध्यक्ष असताना दर वाढविल्याचे सांगत सध्याचे व्यवस्थापन शेतकऱ्यांच्या विरोधी असल्याचा आरोप केला आहे. तर अध्यक्ष विश्‍वास पाटील यांनी हा आरोप फेटाळून लावत हे आरोप राजकीय असल्याचे म्हटले आहे.

‘गोकुळ’चे पश्‍चिम महाराष्ट्रातील दूध संघामध्ये वर्चस्व आहे. एखाद्या आमदाराइतकेच गोकुळच्या संचालकाला महत्त्व असल्याने दुग्ध व्यवसायाबरोबर संघाचे राजकारणही चर्चेत असते. पण इतके असतानाही गोकुळमधील खाबूगिरी चर्चेतून सुटली नाही.