उडीद, मुगाची हमीभाव केंद्रे ऑक्‍टोबरमध्ये सुरू ः पणनमंत्री देशमुख

सोलापूर  : राज्यात आता मूग व उडीद या पिकांची काढणी सुरू झाली आहे. काही प्रमाणात हे धान्य बाजारपेठेत येत आहे. त्या पार्श्‍वभूमीवर हमीभाव खरेदी केंद्रे सुरू करण्याची मागणी शेतकऱ्यांतून होत आहे. या पार्श्‍वभूमीवर ऑक्‍टोबरच्या पहिल्या आठवड्यापासून राज्यभर हमीभाव खरेदी केंद्रे सुरू करण्यात येणार असल्याची माहिती पणनमंत्री सुभाष देशमुख यांनी दिली.  मूग व उडीद या पिकाची प्रामुख्याने मराठवाड्यात मोठ्या प्रमाणावर पेरणी करतात. खरीप हंगामात येणारी ही पिके आहेत. मराठवाड्याबरोबरच काही प्रमाणात विदर्भ व पश्‍चिम महाराष्ट्रात ही पिके घेतात. सोलापूर, बीड, सांगली, औरंगाबाद, लातूर, अमरावती, जालना या जिल्ह्यांचा अपवाद वगळता राज्यातील इतर जिल्ह्यांत चांगला पाऊस झाला आहे. त्यामुळे चांगला पाऊस झालेल्या जिल्ह्यात या पिकाचे मोठ्या प्रमाणावर उत्पन्न होण्याची शक्‍यता आहे. सध्या मूग व उडीद बाजारपेठेत दाखल झाले आहेत. पण, हमीभाव केंद्रे सुरू नसल्याने मिळेल त्या दराने शेतकरी ते विकत आहेत. या पार्श्‍वभूमीवर पणनमंत्री देशमुख यांच्याशी चर्चा केली असता एक-दोन दिवसांत या पिकांसाठी ऑनलाइन अर्ज भरण्याची प्रक्रिया सुरू करणार असल्याचे त्यांनी सांगितले. त्याचबरोबर ऑक्‍टोबरच्या पहिल्या आठवड्यात बाजारपेठांची मागणी लक्षात घेता हमीभाव केंद्रे सुरू केली जातील. सध्याच्या मूग व उडीदात दमटपणा जास्त असतो. त्यामुळे ते कदाचित नाकारले जाण्याची शक्‍यता असते. पुढील १५ दिवसांत दमटपणा कमी झाल्याने हमीभाव केंद्रात ते स्वीकारण्यात येईल, असे श्री. देशमुख म्हणाले. मागील वर्षी जवळपास २०० खरेदी केंद्रं सुरू केली होती.  उडीद व मुगाची हमीभाव केंद्रे सुरू झाल्यानंतर सोयाबीनची केंद्रे सुरू करण्यावर भर असेल. उडीद व मुगापेक्षा सोयाबीन थोड्या उशिराने बाजारात येते. पण, ते बाजारात येण्यापूर्वी हमीभाव केंद्रे सुरू करण्याचा आमचा प्रयत्न असेल. - सुभाष देशमुख, पणनमंत्री