उत्पादन खर्चाबद्दल खुलासा करावा : डॉ. स्वामीनाथन

केंद्र सरकारने आगामी खरिपात सर्व अघोषित पिकांसाठी उत्पादन खर्चाच्या दीडपट किमान आधारभूत किमती देण्याचे जाहीर केले आहे; परंतु त्यासाठी उत्पादन खर्च काय धरणार, हा सगळ्यात महत्त्वाचा मुद्दा आहे. माझ्या अध्यक्षतेखालील राष्ट्रीय शेतकरी आयोगाने २००६ साली सरकारला सादर केलेल्या अहवालात C2 उत्पादन खर्चावर ५० टक्के नफा मिळेल, इतक्या आधारभूत किंमती जाहीर केल्या जाव्यात, अशी शिफारस केलेली आहे. C2 खर्चामध्ये निविष्ठांचा खर्च, शेतकरी आणि त्याच्या कुटुंबाने आपल्याच शेतात केलेली मजुरी यासोबतच जमिनीचे आभासी भाडे आणि स्थायी भांडवली साधनसंपत्तीवरील व्याज हेसुद्धा मोजले जाते. सरकारने राष्ट्रीय शेतकरी आयोगाने सूचविल्याप्रमाणे C2 खर्चावर आधारित आधारभूत किंमती जाहीर करणार का, याविषयी स्पष्टीकरण देण्याची गरज आहे. तसेच केंद्रीय अर्थमंत्री अरुण जेटली यांनी दीडपट आधारभूत किमतीची घोषणा करताना अघोषित पिके अशी संज्ञा वापरली आहे. केंद्रीय कृषी मूल्य व किंमत आयोग ज्या २३ पिकांसाठी आधारभूत किमती जाहीर करत असतो त्यांचा या पिकांमध्ये समावेश होणार की या पिकांव्यतिरिक्त उरलेल्या पिकांसाठीच ही घोषणा लागू आहे, याचाही खुलासा करण्याची आवश्यकता आहे. बाजारात एखाद्या पिकाचे दर हमीभावापेक्षा खाली गेल्यास सरकारने त्या शेतीमालाची खरेदी करावी किंवा इतर मार्गांनी बाजारभाव आणि हमीभाव यांतील फरक शेतकऱ्यांना मिळवून देण्याची व्यवस्था उभारावी.   - प्रो. एम. एस. स्वामिनाथन, विख्यात शास्त्रज्ञ आणि अध्यक्ष, राष्ट्रीय शेतकरी आयोग