दूध संघाचा तोटा भरून काढण्यासाठी सरकारनेच काढावा मार्ग

सोलापूर : महाराष्ट्रातील सहकारी दूध संघांवरच फक्त राज्य सरकार नियंत्रण आणत आहे. त्यामुळे या दूध संघांना मोठा आर्थिक तोटा सहन करावा लागत आहे. राज्यातील खासगी दूध संघांवर मात्र राज्य सरकारचे कोणतेही नियंत्रण नाही. सहकारी दूध संघांना होत असलेला तोटा भरून काढण्यासाठी आता राज्य सरकारनेच पुढाकार घ्यावा, अशी मागणी सोलापूर जिल्हा सहकारी दूध उत्पादक संघाचे अध्यक्ष आमदार प्रशांत परिचारक यांनी येथे पत्रकारांशी बोलताना केली.

राज्य सरकार दूध खरेदीच्या बाबतीत फक्त आदेश देत आहे, आदेशाची अंमलबजावणी न करणाऱ्या सहकारी दूध संघांवर कारवाईचा बडगा उचलला जात आहे. खासगी दूध संघांना मात्र याबाबतचे कोणतेही आदेश नसल्याने ते यातून सुटत आहे. महाराष्ट्रातील दूध व्यवसाय टिकला पाहिजे त्या दृष्टीने शासनाने या व्यवसायाकडे सकारात्मकदृष्टीने पाहण्याची आवश्‍यकता असल्याचेही आमदार परिचारक यांनी सांगितले.

राज्यातील सहकारी दूध संघाच्या वतीने ‘महानंद’ला दूधपुरवठा केला जातो. गाय दुधाच्या दरात महानंदने १ नोव्हेंबरपासून कपात केली आहे. ३.५ फॅट व ८.५ एस.एन.एफ.साठी महानंदने २१ रुपये दर निश्‍चित केला आहे.

जिल्हा व तालुका दूध संघ मात्र आजही २७ रुपये दराने खरेदी करत आहेत. सोलापूर जिल्हा दूध संघाला दररोज तीन लाख रुपयांचा तोटा होत असून, गेल्या चार महिन्यांपासूनही ही आर्थिक झळ दूध सोसत असल्याचेही आमदार परिचारक यांनी सांगितले.

महानंदने राज्यातील सर्व दूध संघांचे दूध स्वीकारावे, महानंदला होणारा तोटा हा राज्य सरकारने महानंदला दिल्यास यातून निश्‍चित मार्ग निघेल. यापूर्वीही बाजारात दूध व दुग्धजन्य पदार्थांची मागणी घटल्यानंतर अशा पद्धतीने तोडगा काढण्यात आला असल्याचेही आमदार परिचारक यांनी सांगितले. राज्यातील दूध संघाच्या प्रश्‍नांसंदर्भात पंधरा दिवसांपूर्वी अकलूजला बैठक झाली होती. बैठक होऊन देखील प्रश्‍न सुटला नसल्याचे आमदार परिचारक म्हणाले.