जैन इरिगेशचे कृषी क्षेत्रातील कार्य अद्वितीय : राज्यपाल

जळगाव ः जैन इरिगेशनने कृषिक्षेत्रात केलेले कार्य अद्वितीय आहे. संस्थापक अध्यक्ष भवरलालजी जैन यांनी कल्पनातीत विश्वाची निर्मिती केली आहे. त्यांनी ही संस्था समस्त मानव जातीच्या कल्याणासाठी निर्माण केली आहे, असे गौरवोद्‍गार महाराष्ट्राचे राज्यपाल सी. विद्यासागर राव यांनी येथे केले. जैन इरिगेशनच्या विविध प्रकल्पांना राज्यपाल सी. विद्यासागर राव यांनी बुधवारी (ता. २०) भेट दिली. या वेळी जैन परिवारातील ज्येष्ठ सदस्य सेवादास दलूभाऊ जैन, जैन उद्योग समूहाचे अध्यक्ष अशोक जैन, उपाध्यक्ष अनिल जैन, सहव्यवस्थापकीय संचालक अजित जैन, अतुल जैन, अभय जैन, अथांग जैन, विभागीय आयुक्त महेश झगडे, जिल्हाधिकारी किशोर राजे निंबाळकर, पोलिस अधीक्षक दत्तात्रेय कराळे, जिल्हा परिषदेचे मुख्य कार्यकारी अधिकारी कौस्तुभ दिवेगावकर उपस्थित होते. राज्यपाल सी. विद्यासागर राव यांनी भवरलाल जैन यांनी उभारलेल्या पहिल्या जलसंधारण प्रकल्प व त्यांच्या स्मृतिस्थळास भेट दिली. त्यानंतर जैन हिल्स येथील टिश्यूकल्चर उत्पादन केंद्रास भेट देऊन केळी, डाळिंब, पेरू, कांदा, बटाटा आदींबाबत माहिती घेतली. उच्च कृषी जैवतंत्रज्ञानाची ओळख करून घेण्यासाठी त्यांनी बायोटेक्नॉलॉजी लॅब, तसेच कृषी विकास व संशोधन केंद्रात डाळिंब, अतिघन फळझाडे लागवडीचे प्रयोग, तसेच उच्च तंत्राने भाजीपाला लागवड प्रात्यक्षिक केंद्रास आणि आंबा, संत्रा, संशोधन व विकास केंद्रासही भेट दिली. ‘पाणी विद्यापीठ’ ज्या ठिकाणी उभारले जाणार आहे, त्या जागेचीही राज्यपाल यांनी पाहणी केली. त्याचप्रमाणे नजीकच्या काळात उभारण्यात येणाऱ्या भारतातील मोठ्या मसाला प्रक्रिया केंद्रास देखील भेट दिली. ‘१०० टक्के ओले आणि कोरड्या मसाल्याचे उत्पादन करण्यात येईल,’ अशी माहितीही राज्यपाल महोदयांना उपाध्यक्ष अनिल जैन यांनी दिली. राष्ट्रपिता महात्मा गांधी यांच्या जीवनचरित्रावर आधारलेले जगातील पहिले ऑडिओ गाइडेड म्युझियम व संशोधन केंद्र ‘गांधीतीर्थ’ येथे राज्यपाल यांनी भेट दिली. तसेच, जैन इरिगेशनचे संस्थापक भवरलाल जैन यांच्या ८० व्या जयंतीनिमित्त राज्यपाल यांच्या हस्ते बेल या वृक्षाची लागवड, तसेच कृषिजल मासिकाच्या विशेषांकाचे प्रकाशन करण्यात आले.