दुचाकी वाहनातही इथेनॉलचा वापर

हैदराबाद : इलेक्ट्रीक वाहनांसह इथेनॉल सारख्या पर्यायी दुचाकी, तीनचाकी वाहनांच्या उत्पादनांना प्रोत्साहन देण्यात येत असल्याची माहिती केंद्रीय वाहतूक मंत्री नितीन गडकरी यांनी येथे दिली.  मंत्री गडकरी म्हणाले, दुचाकी वाहन निर्मिती गहू अाणि भातापासून बनविलेल्या १०० टक्के इथेनॉलवर करण्यासाठी मंत्रालयाने परवानगी दिली आहे. बजाज आणि टीव्हीएस कंपन्यांना आपल्या दुचाकी अाणि रिक्षा उत्पादने लवकरच बाजारात सादर करण्याची शक्यता अाहे. याकरिता कृषी संशोधन संस्थांनी जैवइंथन वर लक्ष केंद्रीत करायला हवे, जेणेकरून भारताची तेल आयात कमी होईल.  गडकरी म्हणाले, की इथेनॉल उत्पादनास प्रोत्साहन देण्यासाठी केंद्र सरकार विविध योजनांवर काम करत आहे. गव्हाचे काड, भाताचे काड, बांबू आणि इतर पिकांपासून सहजगत्या इथेनॉल उत्पादनासाठी योजनांचा वापर होईल. बांबूला आम्ही पहिल्यांदाच झाड म्हणून मान्यता रद्द केली असल्याची मंत्री गडकरी यांनी सांगितले.  हरियाना, पंजाब राज्यात भाताचे काड मोठ्या प्रमाणात जाळले जाते. यामुळे दिल्लीत प्रचंड प्रदूषण होते. मात्र, एक टन भाताच्या काडापासून २८० लिटर इथेनॉल निर्मिती होते. हे इथेनॉल केवळ अायातीला पर्यायच नाही, तर वाजवी खर्चात प्रदूषण मुक्त अाणि स्वच्छ इंथनही असते. 

इथेनॉलच्या माध्यमातून ऊर्जा आणि सामर्थ्य उत्पादन क्षेत्र म्हणून कृषी क्षेत्राला वळावे लागणार असल्याचे केंद्रीय मंत्री गडकरी म्हणाले. भारताला दरवर्षी ७ लाख कोटी रुपये कच्च्या खनिज तेलाच्या अायातीकरिता मोजावे लागतात. जर देशांतर्गत इथेनॉल निर्मिती करून यातील २ लाख कोटी वाचविता अाले, तर भारतीय कृषी क्षेत्र पूर्णत: बदललेले दिसेल. 

दरवर्षी आपण १ लाख कोटी रुपयांचे लाकूड आयात करतो. यात ४० हजार कोटींचा साग, ४ हजार कोटींची कच्ची उदबत्ती काड्या, ३५ हजार रुपयांचा कच्चा कागदाचा लगदा आणि ३५ हजार कोटी रुपयांची वृत्तपत्रांसाठी लागणारा कागद आयात करतो, अशी माहिती मंत्री गडकरी यांनी दिली.