तीन बीटी कंपन्यांवर गुन्हे दाखल

तीन बीटी कंपन्यांवर गुन्हे दाखल
तीन बीटी कंपन्यांवर गुन्हे दाखल

नागपूर : प्रयोगशाळेत तपासणीत बीटी बियाणे अयोग्य असल्याचा निष्कर्ष आल्याने कृषी आयुक्‍तालयाच्या आदेशावरून तीन बियाणे उत्पादकांविरोधात गुरुवारी (ता.२६) कृषी विभागाच्या तक्रारीवरून गुन्हे दाखल करण्यात आले. हे प्रकरण अत्यंत गुंतागुंतीचे असल्याचे सांगत याविषयी अधिक माहिती देण्यास विभागीय गुणवत्ता नियंत्रकाकडून नकार दिला जात होता.   यवतमाळ जिल्ह्यात कपाशीवरील फवारणीदरम्यान विषबाधा होत २२ जणांचा मृत्यू झाला. सदोष बीटी बियाणे असल्याने त्यावर कीडरोगाचा प्रादुर्भाव वाढीस लागला. त्याच्या नियंत्रणासाठी शेतकऱ्यांना अधिक फवारण्या कराव्या लागल्या. त्यामुळे बीटी बियाणे उत्पादक कंपन्यादेखील चौकशीच्या कक्षेत आल्या होत्या.  दरम्यान, नागपूर जिल्ह्यात विविध कंपन्यांच्या बीटी बियाण्याचे नमुने घेण्यात आले होते. हे बियाणे केंद्रीय कापूस संशोधन संस्थेकडे तपासणीसाठी पाठविण्यात आले. प्रयोगशाळेच्या अहवालात हे बियाणे अयोग्य असल्याचा निष्कर्ष समोर आला. हा अहवाल त्यानंतर केंद्रीय कृषी मंत्रालय; तसेच कृषी आयुक्तालयाकडे गेला. त्याआधारे कंपन्यांविरोधात गुन्हे दाखल करण्याचे आदेश गुरुवारी देण्यात आले. सहा बियाणे नमुने अयोग्य असल्याचे कळाल्यानंतर तीन बियाणे नमुनेप्रकरणी नरखेड, पारशिवणी, सावनेर या पोलिस ठाण्यात तीन वेगवेगळे गुन्हे दाखल करण्यात आले आहेत.  कंपन्यांचे नाव तपासात होणार जाहीर नमुने गोपनीय घेतले जातात. त्यावर ठराविक कोड असल्याने कंपनीचे नाव न टाकता पोलिस तक्रार करण्यात आली आहे. पोलिसांच्या चौकशीत या कंपन्यांच्या नावाचा खुलासा होईल. त्याआधारे मग कंपन्यांची नावे जाहीर होतील व पुढील कारवाई होईल, असे कृषी विभागाने सांगितले. विशेष म्हणजे गुन्हा दाखल झाल्यानंतरही कृषी विभागाकडून या प्रकरणाची माहिती देण्यास गोपनीयता बाळगली जात आहे.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com