काबुली हरभरा आयात शुल्क ६० टक्क्यांवर

नवी दिल्ली ः हरभरा आवक बाजारात सुरू झाल्यापासूनच देशांतर्गत बाजारात दर हमीभावाच्या खाली होते. त्यामुळे विदेशांतून होणारी आयात रोखण्यासाठी आणि देशांतर्गत बाजारात हरभरा दर वाढावे, यासाठी सरकारने मंगळवारी (ता. २०) काबुली हरभऱ्याच्या आयात शुल्कात ४० टक्क्यांवरून ६० टक्क्यांपर्यंत वाढ केली आहे.  देशात यंदा परतीचा मॉन्सून बराच काळ रेंगाळल्याने अनेक भागांत शेवटी चांगला पाऊस झाला. त्यामुळे रब्बी पेरणीला पोषक वातावरण होते. त्यातच मागील वर्षी चांगला दर मिळाल्याने यंदा शेतकऱ्यांनी हरभरा पेरणीला प्राधान्य दिले.   पोषक वातवरण आणि वाढलेल्या पेरणीमुळे देशात हरभरा पिकाचे बंपर उत्पादन होणार असल्याचा अंदाज कृषी विभागाने आधीच जाहीर केला आहे. मात्र हरभरा हंगामाच्या सुरवातीलाच माल थोडाबहुत बाजारत येण्यास सुरवात झाल्यानंतर दर हमीभावापेक्षा १००० रुपयांपर्यंत खाली आले होते. सध्या मोठ्या प्रमाणात हरभरा आवक बाजारात होत आहे. सरकारने दर वाढण्यासाठी याआधी आयातशुल्क वाढविले होते. मात्र त्याचा फायदा झाला नाही. आता सरकारने काबुली हरभऱ्यावरील आयात शुल्क ६० टक्क्यांपर्यंत वाढविण्याचा निर्णय घेतला आहे.  सरकारने आयात होणाऱ्या काबुली हरभऱ्याच्या हार्मोनाईज्ड सिस्टिम कोडला काबुली हरभरा आणि बंगाली हरभरा किंवा देशी हरभरा असे विभाजन करून ६० टक्के आयात शुल्क लागू केले आहे. हार्मोनाईज्ड सिस्टिम कोड हे आंतरराष्ट्रीय बाजारात व्यापार होणाऱ्या कमोडिटीचे वर्गीकरण करण्यासाठी नाव आणि नंबरची आंतरराष्ट्रीय प्रमाणित सिस्टिम आहे. सरकारच्या या निर्याणयाने देशात होणाऱ्या आयातीला पायबंद बसून देशांतर्गत हरभऱ्याचे दर वाढण्यास मदत होणार आहे.