दूध संघांना अनुदान द्या : अरुण नरके

अरुण नरके, अध्यक्ष, इंडियन डेअरी असोसिएशन
अरुण नरके, अध्यक्ष, इंडियन डेअरी असोसिएशन

पुणे ः राज्य सरकारने दुधाला २७ रुपये प्रतिलिटरचा भाव जाहीर करण्याची मोठी घोडचूक केली आहे. दूध व्यावसायिक अडचणीत आला असून, हे दूध खरेदी दर कमी करण्याचे धाडस सरकारने दाखवावे. ते शक्य नसेल तर सरकारने दूध संघांना प्रतिलिटर सात रुपये अनुदान द्यावे, अशी मागणी इंडियन डेअरी असोसिएशनचे अध्यक्ष अरुण नरके यांनी केली.

जिल्हा सहकारी दूध संघातर्फे (कात्रज दूध) माजी कृषिमंत्री शरद पवार यांच्या वाढदिवसानिमित्त आयोजित कात्रज एक्स्पोचे उद्‍घाटन माजी खासदार अशोक मोहोळ यांच्या हस्ते झाले. या वेळी श्री. नरके बोलत होते.

या वेळी दूध संघाचे अध्यक्ष विष्णू हिंगे, उपाध्यक्ष वैशाली गोपाळघरे, प्रादेशिक दुग्धविकास अधिकारी महेश मुळे, महानंदच्या माजी अध्यक्षा वैशाली नागवडे, गोपाळ मस्के, रामचंद्र ढोंबरे, रमेश भुजबळ, बाळासाहेब खिलारी, भगवान पासलकर, केशर पवार, व्यवस्थापकीय संचालक विवेक क्षीरसागर अादी उपस्थित होते.

या वेळी अरुण नरके म्हणाले, की जगभरात दूध भुकटीचे दर घसरले अाहेत. दूध भुकटी उत्पादकांना ३० ते ९० रुपये प्रतिकिलो तोटा सहन करावा लागत आहे. देशात मोठ्या प्रमाणावर दूध भुकटी पडून असल्याने भुकटी प्रकल्पासाठी दूध खरेदी नाकारण्यात येत आहे. त्यामुळे शेतकऱ्यांच्या दुधाचे दर उतरवावे लागतील, अशी स्थिती असताना राज्य सरकारने कोणाला तरी खुश करण्यासाठी दुधाचे दर वाढविण्याची घोडचूक केली.

अधिकाऱ्यांच्या सांगण्यावरून घेलेल्या निर्णयामुळे दूध संघ भरडले जात आहेत. गोकुळ दूध संघाला गेल्या चार महिन्यांत २५ कोटी रुपयांचा तोटा झाला आहे. अडचणीच्या काळात दर वाढविण्याचा निर्णय घेतल्यानंतर कोणत्या तोंडाने तो कमी करायचा, अशी सरकारची स्थिती आहे.

पुढील वर्षभर हीच स्थिती राहणार आहे. कर्नाटक सरकारने दूध संघांना प्रतिलिटर ५ रुपये अनुदान दिले असून, राज्य सरकारनेही नुकसानभरपाई म्हणून संघांना प्रतिलिटर सात रुपये अनुदान द्यावे, दूध भुकटीचा बफर स्टॉक करावा, शाळांमध्ये विद्यार्थ्यांना पिण्यासाठी दूध उपलब्ध करून देऊन उत्पादकांना पैसे द्यावेत, अशी मागणी श्री. नरके यांनी या वेळी केली. दुधाचा विक्री दर वाढवू नका ः मोहोळ खासदार अशोक मोहोळ म्हणाले, की कात्रज दूध संघाने शेतकऱ्यांसाठी गीर गाईचा गोठा तयार करण्याचे नियोजन केले आहे. यात एक पाऊल पुढे टाकून देशी गाईच्या दूध उत्पादनात वाढ करण्यासाठी पुढाकार घ्यावा.

इतर राज्यांत सरकार दूध संघांमध्ये लक्ष घालत नाही. महाराष्ट्रात मात्र उलट स्थिती आहे. दूध खरेदी दर वाढवूनही दुधाचा विक्री दर वाढवू नका, असे सांगणे हा सरकारचा नासमजपणा आहे. शेतकऱ्यांच्या फायद्यासाठी तालुका स्थरावर प्रदर्शने भरविण्यात यावीत, असेही श्री. मोहोळ यांनी सांगितले.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com