...अखेर शासकीय कडधान्य खरेदी केंद्र सुरू

अखेर शासकीय  कडधान्य खरेदी केंद्र सुरू
अखेर शासकीय कडधान्य खरेदी केंद्र सुरू

जळगाव : जिल्ह्यात कडधान्य व सोयाबीन खरेदीसाठी गुरुवारी (ता. २६) दुपारी येथील औद्योगिक वसाहतीमधील वखार महामंडळाच्या गोदामात अखेर मार्केटिंग फेडरेशनने शासकीय खरेदी केंद्र सुरू केले आहे. या केंद्रात पहिल्या दिवशी धान्याची कुठलीही खरेदी झाली नाही. मात्र जिल्ह्यात फक्त अमळनेर येथेच कडधान्य खरेदी केंद्र सुरू, पाचोरा व जळगाव येथील खरेदी केंद्रांना मुहूर्त नाहीच, अशा आशयाचे वृत्त ॲग्रोवनने बुधवारी (ता. १८ ऑक्‍टोबर) प्रसिद्ध केले होते. त्याची दखल घेऊन अखेर मार्केटिंग फेडरेशनने जिल्ह्यातील दुसरे कडधान्य खरेदी केंद्र सुरू केले. कृषी उत्पन्न बाजार समितीपासून पुढे काही अंतरावर औद्योगिक वसाहतीमध्ये बी-६ येथे वखार महामंडळाच्या गोदामात हे केंद्र असून, त्यात हमीभावात उडीद, मूग व सोयाबीनची खरेदी केली जाणार असल्याचे सांगण्यात आले. नाफेडअंतर्गत मार्केटिंग फेडरेशनचे हे केंद्र असून, जळगाव तालुका शेतकरी सहकारी खरेदी विक्री संघ मर्यादित हे या केंद्राचे सब एजंट आहेत. केंद्राच्या उद्‍घाटनाला शेतकी संघाच्या उपाध्यक्ष मायाबाई पांडुरंग पाटील, संचालक विजय सोनवणे, बाजार समितीचे सचिव रवींद्र नारखेडे, केंद्राचे प्रमुख चंद्रकांत सूर्यवंशी, कृषी अधिकारी बालाजी कोळी, वखार महामंडळाचे जळगावमधील शाखाध्यक्ष बी. डी.जाधव आदी उपस्थित होते.   ६१ शेतकऱ्यांनी आपल्या धान्य विक्रीसंबंधी या केंद्रात गुरुवारी नोंदणी केली. त्यांना मोबाईलवर एसएमएस गेल्यानंतर धान्य विक्रीसाठी आणायचे आहे. त्यांना शुक्रवारी (ता. २७) हे संदेश किंवा एसएमएस गेले, असे शेतकी संघातून सांगण्यात आले.  सोयाबीनला प्रतिक्विंटल ३०५०, उडदाला ५४०० आणि मुगाला ५५७५ रुपये प्रतिक्विंटल एवढा हमीभाव दिला जाणार आहे. दर्जेदार मालाचीच खरेदी केली जाईल, असे केंद्रप्रमुख यांनी स्पष्ट केले. धान्य विक्रीसाठी येणाऱ्या शेतकऱ्याचा आधार क्रमांक, बॅंक खाते क्रमांक व पीकपेरा असलेला सातबारा याच्या ऑनलाइन नोंदी घेतल्या जात आहेत. सातबाऱ्यावर नोंद नसली तर संबंधित शेतकऱ्याचे कडधान्य किंवा सोयाबीन या केंद्रात खरेदी केला जाणार नाही. ऑनलाइन नोंदणी बंधनकारक आहे, असे सांगण्यात आले.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com