हरभरा पीक मर रोगाच्या विळख्यात

जळगाव : धुळ्यासह जळगाव जिल्ह्यातील हरभऱ्याचे पीक डिसेंबरच्या मध्यापर्यंत चांगले होते; परंतु मागील १० ते १२ दिवसांत फुले व घाटे लगडलेल्या हरभऱ्याच्या पिकात मर रोग वाढला आहे. यामुळे खरिपानंतर आता पुन्हा रब्बी हंगामात नुकसानीला सामोरे जावे लागेल की काय, अशी भीती शेतकऱ्यांमध्ये आहे.

खानदेशात यंदा हरभऱ्याची सर्वाधिक पेरणी रब्बी हंगामासंबंधी झाली आहे. ऑक्‍टोबरमध्ये चांगला ओलावा होता, त्याचा लाभ घेत शेतकऱ्यांनी दिवाळीनंतर पेरणी केली. मुबलक जलसाठा उपलब्ध असलेल्या शेतकऱ्यांनी जमीन ओली करून नंतर मशागत करून पेरणी केली. काळ्या कसदार जमिनीत विशेषतः तापीकाठ, गिरणाकाठावरील गावांमध्ये पेरणी चांगली झाली. पीकही तरारले.

जळगाव जिल्ह्यात यंदा तर विक्रमी ९५ हजार हेक्‍टरवर हरभरा पेरणी झाली. तर धुळ्यातही सुमारे ४० हजार हेक्‍टरवर पेरणी झाली आहे. जळगाव जिल्ह्यातील रावेर, यावल, चोपडा, जळगाव, पाचोरा, भडगाव, पारोळा, मुक्ताईनगर या भागांत तर धुळ्यात शिरपूर, शिंदखेडा, धुळे भागात चांगली पेरणी झाली आहे. पिकाची स्थिती समाधानकारक होती, त्यामुळे चांगला उतारा मिळेल, अशी अपेक्षा होती. परंतु मर रोग आल्याने पीक कोरडे होऊन पूर्णत नष्ट होत आहे. सुरवातीला पिकात फुल व घाटे गळ होते. नंतर पिकाचा रंग लाल, पिवळा होत जातो आणि दोन चार दिवसांत पीक पूर्णतः कोरडे होते, असे शेतकऱ्यांचे म्हणणे आहे.

सिंचन व बिगर सिंचनाच्या क्षेत्रातही रोग ज्या शेतकऱ्यांनी तुषार सिंचन व पट पद्धतीने हरभऱ्याचे सिंचन केले, त्यांच्या शेतासह कोरडवाहू हरभरा पिकातही मर रोग आहे. काही शेतकऱ्यांच्या शेतात सिंचनानंतर मर रोग अधिकचा वाढला. सिंचन गरजेपेक्षा अधिक झाल्याने ही समस्या आली असावी, असा कयास काही शेतकरी लावत आहेत.

२० ते २२ टक्के नुकसान मर रोग वाढतच आहे. त्यात घाटे अळीदेखील असून, शेतकरी फवारण्या घेत आहेत. शिंदखेडा, शिरपुरात फवारण्यांचे काम वेगात सुरू आहे. कोरडवाहू हरभऱ्याचे घाटे भरले आहेत. त्याची काढणी १० ते १२ दिवसांत सुरू होईल, असे चित्र आहे.