नांदेड, हिंगोली, परभणी जिल्ह्यात आजपासून हरभरा खरेदी

नांदेड : केंद्र शासनाच्या किंमत समर्थन योजनेअंतर्गत नांदेड जिल्ह्यातील दोन केंद्रांवर शनिवारपर्यंत (ता. ७) १२ शेतकऱ्यांचा २४४ क्विंटल हरभरा खरेदी झाला आहे. दरम्यान, हरभरा खरेदीसाठी ग्रेडरची नियुक्ती करण्यात आल्यामुळे नांदेड, परभणी, हिंगोली जिल्ह्यातील २० ठिकाणी ठप्प असलेली हरभरा खरेदी सोमवारपासून (ता. ९) सुरू होणार आहे. त्याअनुषंगाने संबंधितांना आदेश देण्यात आले असल्याची माहिती सूत्रांनी दिली.

या तीन जिल्ह्यांत सध्या तूर खरेदी सुरू असलेल्या २२ ठिकाणी आधारभूत किंमत दराने हरभरा खरेदी केली जाणार आहे. हरभरा खरेदीचे आदेश दिल्यानंतर उत्पादकता आदेश नसल्यामुळे खरेदी सुरू झाली नव्हती. उत्पादकता आदेश प्राप्त झाल्यानंतर या केंद्रांवरील ग्रेडर हरभरा खरेदीसाठीच्या स्वंतत्र आदेशासाठी अडून बसले होते, त्यामुळे तीन जिल्ह्यांतील २० केंद्रांवर हरभरा खरेदी ठप्प होती.

मात्र, नांदेड जिल्ह्यातील नांदेड (अर्धापूर) येथे एका शेतकऱ्याची १०.५० क्विंटल आणि देगलूर येथे ११ शेतकऱ्यांची २३३.५० क्विंटल अशी दोन केंद्रांवर एकूण १२ शेतकऱ्यांची २४४ क्विंटल हरभरा खरेदी झाली आहे. हरभऱ्यासाठी तीन जिल्ह्यांत ३३०७ शेतकऱ्यांनी आॅनलाइन नोंदणी केली आहे.

दरम्यान, या केंद्रांवर ग्रेडरची नियुक्ती करण्यात आल्याने सोमवारपासून (ता. ९) हरभरा खरेदी करण्याचे आदेश देण्यात आले आहेत, असे जिल्हा विपणन अधिकारी कार्यालयाच्या सूत्रांनी सांगितले. परंतु आता अनेक ठिकाणी गोदामात साठविण्यासाठी जागा नसल्यामुळे हरभरा खरेदी सुरू करण्यासाठी अडचणी येऊ शकतात. गोदाम उपलब्ध करून देण्यासाठी वखार महामंडळाच्या अधिकाऱ्यांनी रविवारी (ता. ८) मानवत येथे पाहणी केली असल्याचे सूत्रांनी सांगितले. 

गोदामामध्ये जागा अपुरी पडत असल्यामुळे तूर खरेदी संथ गतीने सुरू आहे. गेल्या आठवडाभरात या तीन जिल्ह्यांत २३ हजार ५६९ क्विंटल तूर खरेदी करण्यात आली. शनिवारपर्यंत एकूण १७ हजार ६८८ शेतकऱ्यांची १ लाख ९४ हजार २९ क्विंटल तूर खरेदी करण्यात आली आहे.