सातारा जिल्ह्यात १३५७ क्विंटल हरभरा खरेदी

सातारा : जिल्हा पणन विभागाकडून कोरेगाव व फलटण येथे हमीभावाने हरभरा खरेदी केंद्र सुरू करण्यात आले असून, या केंद्रांवर आतापर्यंत १३५७.७० क्विंटल हरभरा खरेदी झाली आहे. खरेदी केंद्रावर येणाऱ्या हरभऱ्यास ४४०० रुपये क्विंटल असा हमीभाव दिला जात असून, जास्तीत जास्त शेतकऱ्यांनी हरभऱ्याची खरेदी केंद्रावर विक्री करावी, असे आवाहन पणन विभागाकडून करण्यात आले आहे. 

 

जिल्ह्यात रब्बी हंगामात सुमारे २५ हजार हेक्‍टर क्षेत्रावर हरभऱ्याची लागवड झाली होती. हरभरा काढणीची कामे जवळपास उरकली आहेत. काढणीच्या काळात हरभरा दरात घसरण झाल्याने हमीभावापेक्षा कमीने दराने व्यापाऱ्यांकडून तो खरेदी केला जाण्याचा धोका निर्माण झाला होता.

 

हरभऱ्यास शासनाने जाहीर केलेला हमीभाव मिळावा, यासाठी जिल्हा पणन विभागाकडून कोरेगाव व फलटण येथे खरेदी केंद्रे सुरू करण्यात आली आहेत. या दोन्ही केंद्रावर सुमारे ४५० शेतकऱ्यांनी नोंदणी केली होती. यापैकी १५४ शेतकऱ्यांच्या १३५७.७० क्विंटल हरभऱ्याची खरेदी करण्यात आली आहे.

यात फलटण केंद्रावर ५९८.५० तर कोरेगाव केंद्रावर ७५९.२६ क्विंटल हरभरा खरेदी झाला आहे.